కేంద్రం కీలక నిర్ణయం.. పల్నాడు జిల్లాలో అరుదైన ఖనిజాల అన్వేషణకు ఆమోదం!

భారతదేశపు కీలక ఖనిజాల వ్యూహంలో భాగం కావడానికి ఆంధ్రప్రదేశ్ ఒక అడుగు ముందుకు వేసింది. పల్నాడు జిల్లాలో అరుదైన భూ మూలకాలు, ఇతర సంబంధిత కీలక ఖనిజాల ఉనికిని అంచనా వేయడానికి, ఐదేళ్ల అన్వేషణ కార్యక్రమం కోసం కేంద్రం 12 చదరపు కిలోమీటర్ల ప్రాంతాన్ని కేటాయించింది.

భారతదేశ క్రిటికల్ మినరల్స్ (కీలక ఖనిజాల) వ్యూహంలో ఆంధ్రప్రదేశ్ ఒక కీలకమైన మైలురాయిని చేరుకుంది. రాబోయే ఐదేళ్ల కాలంలో అరుదైన మృత్తికా మూలకాలు (Rare Earth Elements - REE), ఇతర సంబంధిత కీలక ఖనిజాల ఉనికిని అంచనా వేసేందుకు కేంద్ర ప్రభుత్వం పల్నాడు జిల్లాలోని 12 చదరపు కిలోమీటర్ల పరిధిలోని ప్రాంతాన్ని ప్రత్యేకంగా రిజర్వ్ చేసింది.

ప్రతీకాత్మక చిత్రం

ఈ రిజర్వ్ చేసిన బ్లాక్ పెట్లూరివారిపాలెం, కాకాని, అచ్చమ్మపాలెం గ్రామాల పరిధిలోకి వస్తుంది. అణు, వ్యూహాత్మక ఖనిజాల అన్వేషణలో దేశంలోనే అగ్రగామి సంస్థ అయిన అణు ఇంధన మంత్రిత్వ శాఖ పరిధిలోని 'అటామిక్ మినరల్స్ డైరెక్టరేట్ ఫర్ ఎక్స్‌ప్లోరేషన్ అండ్ రీసెర్చ్' (AMD) కి ఈ భూభాగాన్ని కేటాయించారు.

ఈ ఐదేళ్ల అన్వేషణ కార్యక్రమంలో భాగంగా ఆయా ప్రాంతాల్లో అరుదైన మృత్తికా మూలకాలు, ఇతర సంబంధిత ఖనిజాల లభ్యత, వాటి నాణ్యతను శాస్త్రీయంగా గుర్తిస్తారు. ప్రస్తుత ఆధునిక సాంకేతిక యుగంలో ఈ ఖనిజాలు అత్యంత కీలకమైనవిగా మారాయి. ముఖ్యంగా ఎలక్ట్రిక్ వాహనాలు (EVs), సెమీకండక్టర్ తయారీ, పునరుత్పాదక ఇంధన రంగాలు (సోలార్, విండ్ పవర్), ఎలక్ట్రానిక్స్ పరికరాలు, ఏరోస్పేస్ మరియు రక్షణ రంగ పరికరాల ఉత్పత్తి వంటి కీలక పరిశ్రమలకు ఈ అరుదైన ఖనిజాలు ఎంతో అత్యవసరం.

అటామిక్ ఎనర్జీ విభాగానికి చెందిన ప్రతిపాదనలను మైన్స్ అండ్ జియాలజీ డైరెక్టర్ పరిశీలించి సమర్పించిన నివేదిక ఆధారంగా రాష్ట్ర ప్రభుత్వం అధికారిక నోటిఫికేషన్ విడుదల చేసింది. అయితే ఈ నోటిఫికేషన్ కేవలం అన్వేషణ ప్రక్రియకు మాత్రమే పరిమితమని పరిశ్రమల శాఖ అధికారులు స్పష్టం చేశారు. దీని ద్వారా AMD సంస్థ భూగర్భ సర్వేలు, నమూనాల సేకరణ, ఖనిజ వనరుల శాస్త్రీయ అంచనా మాత్రమే చేపడుతుంది. వాణిజ్యపరమైన త్రవ్వకాలకు లేదా ఖనిజాల వెలికితీతకు ఎలాంటి అనుమతి లేదని స్పష్టం చేశారు.

నిబంధనల ప్రకారం, అణు ఇంధన విభాగానికి చెందిన అధికారిక సంస్థలు ప్రత్యేక ప్రొస్పెక్టింగ్ లైసెన్స్ లేకుండానే అణు, సంబంధిత కీలక ఖనిజాల అన్వేషణ చేపట్టేందుకు అనుమతి ఉంది. ఈ అన్వేషణ హక్కులు ఐదేళ్ల పాటు చెల్లుబాటులో ఉంటాయి. ఈ వ్యవధిలో AMD ఆ ప్రాంతంలోని ఖనిజ సామర్థ్యాన్ని సమగ్రంగా అంచనా వేస్తుంది.

ఈ పరిశోధనల ఫలితాల ఆధారంగా ఈ ప్రాంతంలో వాణిజ్యపరంగా లాభదాయకమైన ఖనిజ నిక్షేపాలు ఉన్నాయో లేదో తెలుస్తుంది. ఒకవేళ తగినన్ని నిక్షేపాలు లభ్యమైతే, భవిష్యత్తులో మైనింగ్ రంగంతో పాటు సంబంధిత పరిశ్రమల స్థాపనకు, భారీ పెట్టుబడుల రాకకు మార్గం సుగమం కానుంది.