వెదర్ రిపోర్ట్ : ఉపరితల ఆవర్తన ప్రభావం - ఇవాళ, రేపు వర్షాలు..! ఎల్లుండి నుంచి తెలంగాణలో పొడి వాతావరణం

తూర్పు తెలంగాణ, కోస్తాంధ్రపై ఉపరితల ఆవర్తనం కొనసాగుతోంది. దీని ప్రభావంతో ఏపీలోని పలు జిల్లాలు, తెలంగాణలోని కొన్ని జిల్లాల్లో మోస్తరు వర్షాలు, ఈదురుగాలులు వీచే అవకాశం ఉంది.

తూర్పు తెలంగాణ దానిని అనుకుని ఉన్న కోస్తాంధ్ర ప్రాంతాలపై నిన్నటి ఉపరితల ఆవర్తనం కొనసాగుతోంది. ప్రస్తుతం ఇది సగటు సముద్ర మట్టానికి 4.5 కిలోమీటర్ల ఎత్తులో కేంద్రీకృతమై ఉందని వాతావరణ శాఖ వెల్లడించింది. దీని ప్రభావంతో రాగల కొన్ని రోజుల పాటు తెలంగాణ, ఆంధ్రప్రదేశ్ రాష్ట్రాల్లో ఉరుములు, మెరుపులతో కూడిన వర్షాలు కురిసే అవకాశం ఉంది.

వెదర్ రిపోర్ట్

హైదరాబాద్ వాతావరణ కేంద్రం విడుదల చేసిన ఏడు రోజుల వాతావరణ నివేదిక ప్రకారం…నవంబర్ 6 నుండి 7 ఉదయం వరకు రాష్ట్రంలో ఒకటి రెండు చోట్ల తేలికపాటి నుండి మోస్తరు వర్షాలు లేదా ఉరుములతో కూడిన జల్లులు పడే అవకాశం ఉంది. ముఖ్యంగా భద్రాద్రి కొత్తగూడెం, ఖమ్మం, నల్గొండ, సూర్యాపేట, మహబూబాబాద్, రంగారెడ్డి, నాగర్‌కర్నూల్ జిల్లాల్లో ఒకటి రెండు చోట్ల ఉరుములు, మెరుపులు మరియు గంటకు 30-40 కిలోమీటర్ల వేగంతో ఈదురుగాలులు వీచే అవకాశం ఉంది.

నవంబర్ 7 నుంచి 8 వరకు చూస్తే…. ఒకట్రెండు ప్రాంతాల్లో తేలికపాటి నుంచి మోస్తరు వర్షాలు పడవచ్చు. అయితే ఎలాంటి తీవ్రమైన వాతావరణ హెచ్చరికలు లేవు. నవంబర్ 8 నుండి 12 వరకు రాష్ట్రవ్యాప్తంగా పొడి వాతావరణం (Dry Weather) నెలకుంటుందని వాతావరణ శాఖ స్పష్టం చేసింది.

ఏపీ వెదర్ రిపోర్ట్…

అమరావతి వాతావరణ కేంద్రం ప్రకారం…. కోస్తాంధ్ర - యానాంలో ఈరోజు, రేపు, ఎల్లుండి ఒకటి రెండు చోట్ల తేలికపాటి నుండి మోస్తరు వర్షాలు లేదా ఉరుములతో కూడిన జల్లులు కురిసే అవకాశం ఉంది. అలాగే ఉరుములు, మెరుపులతో పాటు గంటకు 30 నుంచి 40 కిలోమీటర్లు, గరిష్టంగా 50 కిలోమీటర్ల వేగంతో బలమైన ఈదురుగాలులు వీచే అవకాశం ఉంది. నవంబర్ 9న కూడా ఉరుములు, ఈదురుగాలుల ప్రభావం కొనసాగే అవకాశం ఉంది.

రాయలసీమలో ఈరోజు, రేపు, ఎల్లుండి ప్రాంతీయంగా ఒకటి లేదా రెండు చోట్ల తేలికపాటి నుంచి మోస్తరు వర్షాలు కురిసే అవకాశం ఉందని అధికారులు వెల్లడించారు. ఈదురుగాలులు, మెరుపుల నేపథ్యంలో పొలాల్లో పనిచేసే రైతులు, వాహనదారులు జాగ్రత్తగా ఉండాలని, చెట్ల కింద ఆశ్రయం పొందవద్దని సూచించారు.

ఏపీ విపత్తుల నిర్వహణ సంస్థ రిపోర్ట్ ప్రకారం… ఇవాళ అల్లూరి, పోలవరం, ఎన్టీఆర్, నంద్యాల, చిత్తూరు, తిరుపతి జిల్లాల్లో అక్కడక్కడ తేలికపాటి నుంచి మోస్తరు వర్షాలు పడొచ్చు. మిగతా జిల్లాల్లో తేలికపాటి వర్షాలు కురిసే సూచనలున్నాయి.