Jr NTR Trivikram God Of War Controversy: 'ఆర్ఆర్ఆర్', 'దేవర' చిత్రాలతో అంతర్జాతీయ స్థాయిలో మార్కెట్ సంపాదించుకున్న గ్లోబల్ స్టార్ జూనియర్ ఎన్టీఆర్, స్టార్ డైరెక్టర్ త్రివిక్రమ్ శ్రీనివాస్ కాంబినేషన్లో రాబోతున్న కొత్త ప్రాజెక్ట్ అనౌన్స్మెంట్ రోజే సంచలనం సృష్టించింది.
ఎన్టీఆర్, త్రివిక్రమ్ సినిమాకు వివాదం
హారిక అండ్ హాసిని క్రియేషన్స్ పతాకంపై సూర్యదేవర నాగవంశీ నిర్మిస్తున్న ఈ చిత్రంపై టాలీవుడ్లో భారీ అంచనాలు ఉన్నాయి. అయితే, ఈ సినిమా కథాంశంపై పొరుగు రాష్ట్రం తమిళనాడులో అప్పుడే వివాదాల మంటలు రాజుకున్నాయి.
తమిళనాడుకు చెందిన ప్రముఖ రాజకీయ నాయకుడు, నామ్ తమిళర్ కట్చి (NTK) అధినేత సీమాన్ ఈ సినిమాపై తీవ్ర ఆగ్రహం వ్యక్తం చేస్తూ సోషల్ మీడియా వేదికగా ఒక సుదీర్ఘ ప్రకటన విడుదల చేశారు. కథలో తమిళ సంస్కృతిని కించపరిచినా, చరిత్రను మార్చినా తీవ్ర పరిణామాలు ఎదుర్కోవాల్సి ఉంటుందని ఆయన హెచ్చరించారు.
ఉత్తరాదిలో జన్మించాడు
ఈ వివాదానికి ప్రధాన కారణం జూన్ 29న చిత్ర బృందం విడుదల చేసిన అధికారిక ప్రకటన. నిర్మాత నాగవంశీ ఈ సినిమాను అనౌన్స్ చేస్తూ పెట్టిన పోస్ట్ తమిళులకు ఆగ్రహం తెప్పించింది. ఆ పోస్ట్లో.. "ఉత్తరాదిలో జన్మించాడు.. దేశ హృదయభూమిలో రూపుదిద్దుకున్నాడు.. దక్షిణాదిలో పూజలందుకుంటున్నాడు.. ఇప్పుడు విశ్వానికి చెందాల్సిన కథగా వస్తున్నాడు" అని నాగవంశీ పేర్కొన్నారు.
ఈ క్యాప్షన్తో పాటు విడుదల చేసిన పోస్టర్ చూస్తే ఇది తమిళుల ఆరాధ్య దైవమైన మురుగన్ (కార్తికేయుడు) కథ అని స్పష్టంగా అర్థమవుతోంది. అయితే, మురుగన్ ఉత్తరాదిలో జన్మించాడనే లైన్ తమిళులకు అస్సలు నచ్చలేదు. తమిళ సంస్కృతితో విడదీయరాని బంధం ఉన్న తమ దేవుడిని ఉత్తరాది వాడిగా చూపించడంపై సోషల్ మీడియాలో పెద్ద ఎత్తున నిరసనలు వ్యక్తమవుతున్నాయి.
ఉత్తరాది సంస్కృతిని రుద్దకండి: సీమాన్
తమిళనాడు రాజకీయాల్లో సెంటిమెంట్ను బలంగా వినిపించే సీమాన్.. ఎన్టీఆర్ సినిమా టీమ్ను ఉద్దేశించి తీవ్ర వ్యాఖ్యలు చేశారు. కళ అనే ముసుగులో మురుగన్ ఉత్తరాది ప్రాంతాల్లో జన్మించాడనే అభూత కల్పనలను సృష్టించి తమపై రుద్దే ప్రయత్నాలను వెంటనే మానుకోవాలని డిమాండ్ చేశారు.
{{/usCountry}}తమిళనాడు రాజకీయాల్లో సెంటిమెంట్ను బలంగా వినిపించే సీమాన్.. ఎన్టీఆర్ సినిమా టీమ్ను ఉద్దేశించి తీవ్ర వ్యాఖ్యలు చేశారు. కళ అనే ముసుగులో మురుగన్ ఉత్తరాది ప్రాంతాల్లో జన్మించాడనే అభూత కల్పనలను సృష్టించి తమపై రుద్దే ప్రయత్నాలను వెంటనే మానుకోవాలని డిమాండ్ చేశారు.
{{/usCountry}}"తమకంటూ ప్రత్యేక గుర్తింపు, సాంస్కృతిక అంశాలు, పూజా పద్ధతులు లేని కొన్ని శక్తులు.. శివుడు, మురుగన్, కణ్ణన్, తిరుమాల్, కొట్రవై వంటి తమిళ దేవుళ్లను దొంగిలించి తమవిగా చెప్పుకుంటున్నాయి. ప్రాచీన కాలం నుంచి తమిళ సంస్కృతి, జీవన విధానంతో మురుగన్ విడదీయరాని విధంగా కలిసిపోయారు. తమిళం అంటే మురుగన్.. మురుగన్ అంటే తమిళం. ఆ చరిత్రను విచ్ఛిన్నం చేయాలని చూస్తే చూస్తూ ఊరుకోం" అని సీమాన్ తన ప్రకటనలో పేర్కొన్నారు.
థియేటర్లలో ప్రదర్శనను అడ్డుకుంటాం!
తమిళ సంస్కృతిని విస్మరించి, తమిళుల మనోభావాలను దెబ్బతీసేలా రూపొందిస్తున్న ఈ చిత్రం విడుదల అయితే రాష్ట్రంలో శాంతిభద్రతల సమస్యలు తలెత్తే ప్రమాదం ఉందని సీమాన్ ఆందోళన వ్యక్తం చేశారు. అందుకే ఈ సినిమా తెలుగు, తమిళ వెర్షన్లకు తమిళనాడు ప్రభుత్వం అనుమతి ఇవ్వకూడదని కోరారు.
ఒకవేళ చిత్ర యూనిట్ వెనక్కి తగ్గకపోతే, థియేటర్ల యజమానులు కూడా ఈ సినిమాను ప్రదర్శించకుండా నిషేధించాలని, లేదంటే ఊహించని పరిణామాలు ఉంటాయని హెచ్చరించారు.
హిమాలయాల్లో జన్మించి, దక్షిణాదికి వచ్చినట్లు
నిజానికి, ఉత్తరాది పురాణాల ప్రకారం కార్తికేయుడు హిమాలయాల్లో జన్మించి, ఆ తర్వాత దక్షిణాదికి వచ్చినట్లు చెబుతారు. కానీ, తమిళ సంప్రదాయం ప్రకారం మురుగన్ పూర్తిగా తమిళ నేలకు (కురింజి ప్రాంతం) చెందిన స్థానిక దేవుడు. ఈ రెండు సంస్కృతుల మధ్య ఉన్న వ్యత్యాసమే ఇప్పుడు సినిమా చుట్టూ వివాదానికి దారితీసింది.
గాడ్ ఆఫ్ వార్కు రాజకీయ సెగ
'గాడ్ ఆఫ్ వార్' (God of War) అనే టైటిల్తో ప్రచారంలో ఉన్న ఈ సినిమా ఇంకా షూటింగ్ కూడా ప్రారంభం కాలేదు. సీమాన్ చేసిన ఈ ఘాటు వ్యాఖ్యలపై హీరో జూనియర్ ఎన్టీఆర్ గానీ, దర్శకుడు త్రివిక్రమ్ గానీ, నిర్మాత నాగవంశీ గానీ ఇప్పటివరకు ఎలాంటి అధికారిక స్పందన ఇవ్వలేదు. పాన్ ఇండియా రేంజ్లో ప్లాన్ చేస్తున్న ఈ ప్రాజెక్ట్కు ప్రారంభంలోనే ఇలాంటి రాజకీయ సెగ తగలడం ఇండస్ట్రీలో చర్చనీయాంశంగా మారింది.