E-Paper
Mayookha Review: మయూఖ రివ్యూ-విడుదలకు ముందే అవార్డులు- పాయల్ వన్ వుమెన్ షో- బిగ్ బాస్ అమన్ మిస్టరీ థ్రిల్లర్ ఎలా ఉందంటే?
Mayookha Review And Rating In Telugu: విడుదలకు ముందే అంతర్జాతీయ గుర్తింపు పొందిన మిస్టరీ థ్రిల్లర్ మయూఖ ఇవాళ థియేటర్లలోకి వచ్చింది. పాయల్ చెంగప్ప నటన, డైరెక్టర్ శ్రీ తేజ్ ఎస్కే టేకింగ్, బిగ్ బాస్ అమన్ డెబ్యూ, ఉత్కంఠ రేకెత్తించే సీన్లు ప్రేక్షకులను ఏమేరకు మెప్పించాయో నేటి మయూఖ రివ్యూలో తెలుసుకుందాం.
Prefer HTon Google
Mayookha Movie Review And Rating In Telugu: బ్యూటిఫుల్ పాయల్ చెంగప్ప, దేవ్ డి, మురళీధర్ గౌడ్, బిగ్ బాస్ తెలుగు 10 అమన్ మసూద్ ప్రధాన పాత్రల్లో నటించిన చిత్రం 'మయూఖ'. శ్రీ తేజ్ ఎస్కే (శ్రీకాంత్ కండ్రేగుల) దర్శకత్వంలో శశిధర్ నల్ల నిర్మించిన ఈ మిస్టరీ థ్రిల్లర్ అక్టోబర్ 09న అంటే ఇవాళ థియేటర్లలోకి వచ్చింది.
విడుదలకు ముందే అవార్డులు
విడుదలకు ముందే ప్రతిష్టాత్మక 'న్యూయార్క్ ఇంటర్నేషనల్ ఫిలిం అవార్డ్స్' (NYIFA) వేదికపై ఉత్తమ మిస్టరీ చిత్రం పురస్కారం సొంతం చేసుకుని సినీ వర్గాల్లో తీవ్ర ఆసక్తి రేకెత్తించింది. ఒక భారతీయ సస్పెన్స్ సినిమా విడుదలకు ముందే విదేశీ గడ్డపై అవార్డు గెలుచుకోవడంతో భారీ అంచనాలు నెలకొన్నాయి. మరి ఇలాంటి ఈ సినిమా ఎలా ఉందో నేటి మయూఖ రివ్యూలో తెలుసుకుందాం.
ట్విస్టుల వేట.. అసలు కథేంటంటే?
దివ్య అనే యువతి హత్యతో సినిమా కథ ప్రారంభమవుతుంది. ఆ ఘటన తర్వాత మయూఖ (పాయల్ చెంగప్ప) ఉండే ఫ్లాట్‌లో ఎవరో తిరుగుతున్నారనే భయంకరమైన అనుభూతి ఆమెకు కలుగుతుంది. దీనిపై పోలీసులకు ఫిర్యాదు చేసినప్పటికీ, ఆధారాలు దొరక్కపోవడంతో అధికారులు ఆమెను హెచ్చరించి వెళ్లిపోతారు.
ప్రతిక్షణం భయంతో గడిపే మయూఖ, సీసీ టీవీ ఫుటేజ్ పరిశీలించగా తన మాజీ సహద్యోగి ఆ ఇంటికి వచ్చి వెళ్లినట్లు తెలుస్తుంది. సరిగ్గా అదే సమయంలో అతను వచ్చి తలుపు తడతాడు. అనుమానంతో అతనిని ఇంట్లోనే బంధించి బయట లాక్ వేసి పోలీసులకు సమాచారం అందిస్తుంది మయూఖ. అధికారులు వచ్చి తలుపు తెరిచి చూడగా ఆ వ్యక్తి శవమై కనిపిస్తాడు. ఈ హత్య వెనుక మయూఖ ఉందనే అనుమానంతో పోలీసులు ఆమెను అరెస్ట్ చేస్తారు.
ఆ తర్వాత నిజ నిర్ధారణ చేసి వదిలేస్తారు. అసలు మయూఖను భయపెడుతున్న వ్యక్తి ఎవరు? ఆమె ఫ్లాట్‌లో నిజంగానే మూడో వ్యక్తి ఉన్నాడా? ఆ సహద్యోగి ఎలా హత్యకు గురయ్యాడు? దానికి దివ్య హత్యకు ఏమైనా సంబంధం ఉందా? వంటి థ్రిల్లింగ్ విషయాలు తెలియాలంటే మయూఖను తెరపై చూడాల్సిందే.
గ్రిప్పింగ్ స్క్రీన్‌ప్లే.. సీట్ ఎడ్జ్ ఎక్స్‌పీరియన్స్!
మిస్టరీ థ్రిల్లర్ సినిమాలకు ప్రధాన బలం ప్రేక్షకుడిని ప్రతి సన్నివేశంలోనూ ఉత్కంఠకు గురిచేయడమే. గతంలో అడవి శేష్ నటించిన 'ఎవరు' చిత్రం తరహాలోనే ఈ సినిమా కూడా ప్రేక్షకుల ఊహకు అందని మలుపులతో సాగుతుంది. మొదటి భాగం అంతా అసలు ఇంట్లో నిజంగానే ఎవరైనా ఉన్నారా లేదా అంతా మయూఖ మానసిక భ్రమా అనే సందేహంలోనే కథ నడుస్తుంది.
సెకండాఫ్‌లో దర్శకుడు అసలు చిక్కుముడులను ఒక్కొక్కటిగా విప్పుతూ వెళ్లారు. ప్రతి పాత్రపై అనుమానం కలిగేలా కథనాన్ని నడిపించారు. చివరి అరగంట ముందు అసలు విషయం వెలుగులోకి వస్తుంది. కొన్ని సీన్లు ముందే ఊహించేలా సాగినా, కథనం ఎక్కడా వేగం తగ్గకుండా రేసీగా నడుస్తుంది. అంతేకాకుండా రెండవ భాగానికి బలమైన లీడ్ ఇస్తూ సినిమాను ముగించారు.
పాయల్ వన్ వుమెన్ షో.. మెప్పించిన సాంకేతిక బృందం
మయూఖ పాత్రలో పాయల్ చెంగప్ప పూర్తిస్థాయిలో జీవించింది. భయం, ఆందోళన, అనుమానం వంటి హావభావాలను అద్భుతంగా పండించి సినిమాను తన భుజాలపై నడిపించింది. బిగ్ బాస్ ఫేమ్ అమన్, అభిలాష్ తమ పాత్రలకు పూర్తి న్యాయం చేశారు. అభిలాష్ పాత్రలోని వైవిధ్యం ప్రేక్షకులను ఆకట్టుకుంటుంది. మురళీధర్ గౌడ్, లావణ్య రాణి తమ పరిధి మేరకు నటించారు.
సాంకేతిక విభాగం విషయానికి వస్తే, దర్శకుడు శ్రీతేజ్ ఎస్‌కె ఎంచుకున్న కథాంశం, దానిని తెరకెక్కించిన విధానం ఆకట్టుకుంటుంది. సినిమాలో ప్రత్యేకంగా పాటలు లేనప్పటికీ, సీబి మాథ్యూ అలెక్స్ అందించిన నేపథ్య సంగీతం సన్నివేశాల తీవ్రతను పెంచింది. శరత్ జె ఎడిటింగ్ వర్క్, శశిధర్ నల్ల నిర్మాణ విలువలు సినిమాకు అదనపు బలాన్ని చేకూర్చాయి.
మంచి థ్రిల్లింగ్ ఎక్స్‌పీరియెన్స్
ఫస్టాఫ్ కంటే సెకండాఫ్‌లో వచ్చే సస్పెన్స్ ఎలిమెంట్స్ థ్రిల్లర్ ఫ్యాన్స్‌కు మంచి థ్రిల్ పంచుతాయి. ఫైనల్‌గా చెప్పాలంటే మిస్టరీ డ్రామాలను ఇష్టపడే ప్రేక్షకులకు మంచి థ్రిల్లింగ్ ఎక్స్‌పీరియెన్స్ ఇచ్చే సినిమా మయూఖ. కాబట్టి థియేటర్లలో మయూఖపై ఓసారి కచ్చితంగా లుక్కేయవచ్చు.
