పెళ్లి చేసుకోనున్న స్టార్ హీరో దత్తపుత్రిక- సుముద్రపు ఒడ్డున రొమాంటిక్‌గా లవ్ ప్రపోజల్- పెళ్లి డేట్ చెప్పిన సినీ జంట

Mithun Chakraborty Daughter Dishani Wedding: బాలీవుడ్‌లో డిస్కో డాన్సర్‌గా గుర్తింపు తెచ్చుకున్న సీనియర్ స్టార్ హీరో మిథున్ చక్రవర్తి దత్తపుత్రిక దిషాని చక్రవర్తి నిశ్చితార్థం ఘనంగా జరిగింది. తన లాంగ్‌టైమ్ బాయ్‌ఫ్రెండ్ మైల్స్ మంట్జారిస్‌తో కలిసి దిషాని ఈ విషయాన్ని అధికారికంగా ప్రకటించింది.

Mithun Chakraborty Daughter Dishani Wedding: బాలీవుడ్ సీనియర్ స్టార్ హీరో, లెజెండరీ నటుడు మిథున్ చక్రవర్తి ఇంట్లో త్వరలోనే పెళ్లి వేడుకలు జరగనున్నాయి. మిథున్ చక్రవర్తి దత్తపుత్రిక దిషాని చక్రవర్తి నిశ్చితార్థం వైభవంగా జరిగింది. తన ప్రియుడు మైల్స్ మంట్జారిస్‌తో కలిసి దిషాని సోషల్ మీడియా వేదికగా ఈ విషయాన్ని పంచుకుంది.

పెళ్లి చేసుకోనున్న స్టార్ హీరో దత్తపుత్రిక- సుముద్రపు ఒడ్డున రొమాంటిక్‌గా లవ్ ప్రపోజల్- పెళ్లి డేట్ చెప్పిన సినీ జంట

రొమాంటిక్ ప్రపోజల్

సముద్రపు ఒడ్డున ఉన్న ఒక ఎత్తైన కొండపై మైల్స్ ఎంతో రోమాంటిక్‌గా దిషానికి ప్రపోజ్ చేశాడు. మోకాళ్లపై కూర్చుని ఉంగరం తొడుగుతున్న ఫోటోలను ఈ మైల్స్-దిషాని జంట ఇన్‌స్టాగ్రామ్‌లో అప్‌లోడ్ చేసింది.

ఈ వేడుక కోసం మైల్స్ ఆ ప్రపోజల్ స్పాట్‌ను బ్లాక్ అండ్ వైట్ కార్పెట్, కొవ్వొత్తులు, రంగురంగుల పూలతో ఎంతో అందంగా అలంకరించాడు. దిషాని చేతికి ఉంగరం తొడిగి, నుదుటిపై ముద్దు పెడుతున్న ఫోటోలు ప్రస్తుతం సోషల్ మీడియాలో తెగ వైరల్ అవుతున్నాయి.

తాము ఇద్దరం ఈ ఏడాది చివర్లో అంటే డిసెంబర్ 6, 2026 న వివాహ బంధంలోకి అడుగుపెట్టనున్నట్లు ఈ జంట వెల్లడించింది. "06.12.2026... నా జీవితంలో అత్యంత సులువైన శాశ్వత బంధం" అంటూ ఈ ఫోటోలకు క్యాప్షన్ ఇచ్చారు.

అన్నయ్యల ఆశీస్సులు.. బాలీవుడ్ శుభాకాంక్షలు

దిషాని చక్రవర్తి నిశ్చితార్థపు ఫోటోలపై ఆమె అన్నయ్యలు, నటులు మిమో చక్రవర్తి (మహా అక్షయ్), నమాషి చక్రవర్తి స్పందించారు. హార్ట్ ఎమోజీలతో పాటు "మీరిద్దరూ ఎల్లప్పుడూ సంతోషంగా ఉండాలి. లవ్ యూ బోత్" అని నమాషి కామెంట్ పెట్టాడు. వీరితో పాటు సీనియర్ నటి భాగ్యశ్రీ కుమారుడు, బాలీవుడ్ యువ హీరో అభిమన్యు దాసాని కూడా ఈ కొత్త జంటకు శుభాకాంక్షలు తెలియజేశాడు.

ఇంతకీ మిథున్ అల్లుడు ఏం చేస్తాడు?

మిథున్ చక్రవర్తి కాబోయే అల్లుడు మైల్స్ మంట్జారిస్ సినిమా రంగానికి చెందినవాడే. అతను హాలీవుడ్‌లో స్టెడిక్యామ్ ఆపరేటర్‌గా, కలరిస్ట్‌గా పనిచేస్తున్నాడు. సోషల్ మీడియాలో తన వర్క్‌కు సంబంధించిన వీడియోలను మైల్స్ తరచూ షేర్ చేస్తుంటాడు. ఇటీవల ప్రపంచవ్యాప్తంగా పాపులర్ అయిన మొరాకో సింగర్ ఫౌజియా పాడిన 'అన్ఎథికల్' సాంగ్‌కు కూడా మైల్స్ స్టెడిక్యామ్ ఆపరేటర్‌గా వ్యవహరించాడు.

దిషాని చక్రవర్తి నేపథ్యం ఇదే..

మిథున్ చక్రవర్తి మొదట 1979లో నటి హెలెనా లూక్‌ను వివాహం చేసుకున్నారు. అయితే వీరి బంధం నాలుగు నెలలకే ముగిసిపోయింది. ఆ తర్వాత అదే ఏడాది ఆయన యోగితా బాలీని పెళ్లాడారు. వీరికి మిమో, ఉష్మే, నమాషి అనే ముగ్గురు కుమారులు జన్మించారు. ఆ తర్వాత మిథున్ దంపతులు దిషానిని దత్తత తీసుకున్నారు.

సొంత పిల్లల కంటే ఎక్కువగా దిషానిని మిథున్ చక్రవర్తి ప్రేమగా పెంచారు. దిషాని చక్రవర్తి అమెరికాలోని లాస్ ఏంజెల్స్‌లోని 'న్యూయార్క్ ఫిల్మ్ అకాడమీ'తో పాటు ప్రఖ్యాత 'లీ స్ట్రాస్‌బర్గ్ థియేటర్ అండ్ ఫిల్మ్ ఇన్‌స్టిట్యూట్'లో సినిమా కోర్సులు పూర్తి చేసింది.

కేవలం నటనపైనే కాకుండా స్క్రీన్ ప్లే, డైరెక్షన్‌పై దిషాని చక్రవర్తికి మంచి పట్టు ఉంది. ఇప్పటికే 'గిఫ్ట్', 'హోలీ స్మోక్', 'అండర్‌పాస్', 'ది గెస్ట్' (2022) వంటి పలు షార్ట్ ఫిలిమ్స్‌కు ఆమె రైటర్‌గా, ప్రొడ్యూసర్‌గా వ్యవహరించి మెప్పు పొందింది.

ఐదు దశాబ్దాల మిథున్ సినీ ప్రస్థానం

నటుడిగా మిథున్ చక్రవర్తి ప్రస్థానం భారతీయ సినిమా చరిత్రలో ఒక సువర్ణ అధ్యాయం. ఐదు దశాబ్దాలకు పైగా కెరీర్‌లో ఆయన 350కి పైగా చిత్రాల్లో నటించారు. 1976లో ప్రఖ్యాత దర్శకుడు మృణాల్ సేన్ తెరకెక్కించిన 'మృగయా' సినిమాతో ఆయన వెండితెరకు పరిచయమయ్యారు.

మొదటి సినిమాతోనే ఉత్తమ నటుడిగా జాతీయ చలనచిత్ర అవార్డును మిథున్ చక్రవర్తి అందుకోవడం విశేషం. ఆ తర్వాత 1982లో వచ్చిన 'డిస్కో డాన్సర్' సినిమాతో ఆయన దేశవ్యాప్తంగా సెన్సేషన్ సృష్టించారు.

తెలుగులో గోపాల గోపాల సినిమాలో

సినిమాలతో పాటు టెలివిజన్ రంగంలో 'డ్యాన్స్ ఇండియా డ్యాన్స్' రియాలిటీ షోకు గ్రాండ్ మాస్టర్‌గా వ్యవహరించి బుల్లితెర ప్రేక్షకులకు మరింత దగ్గరయ్యారు మిథున్. తెలుగులో వెంకటేష్, పవన్ కల్యాణ్ నటించిన గోపాల గోపాల సినిమాలోనూ మిథున్ చక్రవర్తి నటించారు.

ఇటీవల 'ది బెంగాల్ ఫైల్స్', 'ప్రోజాపతి 2' చిత్రాల్లో కనిపించిన మిథున్ చక్రవర్తి.. త్వరలోనే సన్నీ డియోల్ లీడ్ రోల్ పోషిస్తున్న భారీ యాక్షన్ చిత్రం 'బట్వారా 1947' (గతంలో లాహోర్ 1947) సినిమాలో ఒక కీలక పాత్రలో కనిపించనున్నారు.