E-Paper
OTT Thriller Telugu: ఓటీటీలో అదరగొడుతున్న తెలుగు థ్రిల్లర్ డ్రామా.. పెళ్లికి ముందు ముఖం చూపిస్తే మరణం.. ఎక్కడ చూడాలంటే?
Paradha OTT Streaming: అనుపమ పరమేశ్వరన్ ప్రధాన పాత్రలో నటించిన తెలుగు సోషల్ థ్రిల్లర్ డ్రామా చిత్రం పరదా ఓటీటీలో అదరగొడుతోంది. వింత ఆచారాలు, స్త్రీ స్వేచ్ఛ చుట్టూ సాగే ఈ సినిమాలో దర్శనా రాజేంద్రన్, సంగీత మరో కీలక పాత్రలు పోషించారు. మరి పరదా ఓటీటీ స్ట్రీమింగ్ ఎక్కడో ఇక్కడ తెలుసుకుందాం.
Prefer HTon Google
OTT Telugu Social Thriller Drama Streaming: పెళ్లికి ముందు పరాయి పురుషుడికి ముఖం చూపిస్తే మరణశిక్ష విధించే వింత ఆచారం ఉన్న ఒక గ్రామం. ఊహకందని ఈ కట్టుబాటు నేపథ్యంగా తెరకెక్కిన తెలుగు సోషల్ డ్రామా చిత్రమే 'పరదా'.
ఓటీటీలో ఆకట్టుకుంటోన్న పరదా
బ్యూటిఫుల్ అనుపమ పరమేశ్వరన్, మలయాళ భామ దర్శనా రాజేంద్రన్, సీనియర్ హీరోయిన్ సంగీత ప్రధాన పాత్రల్లో నటించిన పరదా ఓటీటీలో ఆకట్టుకుంటోంది. సంప్రదాయాలు, స్త్రీ స్వేచ్ఛ మధ్య జరిగే ఘర్షణను ప్రతిబింబించే పరదా ఓటీటీ వాచ్‌రి బెస్ట్ ఆప్షన్.
ఆచారాల ముసుగులో వింత ప్రపంచం.. అసలు కథేంటి?
పడతి అనే ఒక మారుమూల గ్రామంలో ఈ కథ మొదలవుతుంది. ఆ ఊరి నియమాల ప్రకారం మహిళలు ఎల్లప్పుడూ ముసుగు (పరదా)లోనే ఉండాలి. పరాయి మగవాడు వారి ముఖాన్ని చూస్తే గ్రామ దేవత 'జ్వాలాంబిక' శాపంతో ఊళ్లో గర్భిణీలకు పుట్టే పిల్లలు చనిపోతారనే మూఢనమ్మకాన్ని అక్కడి ప్రజలు బలంగా నమ్ముతారు. అలాగే, అలా పెళ్లికి ముందు మొహం చూపిస్తే వారికి మరణశిక్ష కూడా విధిస్తారు.
ఊరి కట్టుబాట్లను దైవసమానంగా భావించే అమాయకపు పల్లెటూరి అమ్మాయి సుబ్బు (అనుపమ పరమేశ్వరన్). సుబ్బు జీవితం ప్రశాంతంగా సాగుతున్న సమయంలో ఒక ఊహించని మలుపు తిరుగుతుంది. ఆమెకు తెలియకుండానే ఒక ప్రముఖ మ్యాగజైన్ కవర్ పేజీపై సుబ్బు ఫోటో ప్రింట్ అయి వస్తుంది. ఆ ఫోటోను గ్రామస్థులు చూడటంతో సుబ్బు జీవితం ఒక్కసారిగా అల్లకల్లోలమవుతుంది. దాంతో ఆమె పెళ్లి ఆగిపోతుంది. ఆచారాల పేరుతో సమాజం వేసే ప్రశ్నలను ఎదుర్కొంటూ ఆమె తన ఆత్మగౌరవాన్ని సుబ్బు ఎలా కాపాడుకుంది అనేదే ఈ చిత్ర ముఖ్యాంశం.
అనుపమ, దర్శనల నటన.. పాత్రల్లో లీనం!
పరదా చిత్రంలో అనుపమ పరమేశ్వరన్ తన నటనా ప్రతిభను మరోసారి నిరూపించుకున్నారు. అమాయకపు గ్రామీణ యువతిగా మొదలై, పరిస్థితులకు ఎదురొడ్డి నిలిచే ధీరగా ఆమె పండించిన భావోద్వేగాలు ప్రేక్షకులను కట్టిపడేస్తాయి. కట్టుబాట్లలో నలిగిపోయే బాధను, స్వేచ్ఛను కోరుకునే తపనను ఆమె కళ్లలోనే ఆవిష్కరించారు.
మరో కీలక పాత్రలో నటించిన దర్శనా రాజేంద్రన్ (అమిష్ట) నటన సినిమాకు ప్రధాన ఆకర్షణగా నిలుస్తుంది. ప్రశ్నించే తత్వంతో, స్త్రీ హక్కుల కోసం పోరాడే స్వతంత్ర భావాలు కలిగిన పాత్రలో ఆమె ఒదిగిపోయారు. సుబ్బు అత్తగా సంగీత క్రిష్ తనదైన శైలిలో మెప్పించగా, రాగ్ మయూర్, రాజేంద్ర ప్రసాద్, హర్షవర్ధన్ తమ పాత్రలకు పూర్తి న్యాయం చేశారు. దర్శకుడు గౌతమ్ వాసుదేవ్ మీనన్ చిన్న క్యామియో రోల్‌తో అలరించారు.
బలాలు, బలహీనతలు.. చూడొచ్చా?
సంప్రదాయాల పేరుతో మహిళలపై రుద్దే ఆంక్షలు, వారి అంగీకారం (Consent) ప్రాముఖ్యతను పరదా సినిమా బలంగా ప్రశ్నిస్తుంది. ప్రథమార్ధం వేగంగా సాగుతూ ప్రేక్షకునిలో ఆసక్తిని రేకెత్తిస్తుంది. అయితే, సెకండాఫ్‌లో కథ కాస్త నెమ్మదించి, అక్కడక్కడా ప్రధాన ఇతివృత్తం నుంచి పక్కదారి పట్టినట్లు అనిపిస్తుంది.
ఏదేమైనా, రెగ్యుయలర్ కమర్షియల్ చిత్రాలకు భిన్నంగా సామాజిక స్పృహతో కూడిన కథలను ఆదరించే వారికి 'పరదా' మంచి అనుభూతిని ఇస్తుంది. మన సమాజంలోని మూఢనమ్మకాలపై ఆలోచింపజేసే ఈ సినిమా పరదాను ఓటీటీలో ఎంచక్కా వీక్షించవచ్చు.
పరదా ఓటీటీ స్ట్రీమింగ్
ప్రస్తుతం అమెజాన్ ప్రైమ్ వీడియో (Amazon Prime Video)లో పరదా ఓటీటీ స్ట్రీమింగ్ అవుతోంది. తెలుగుతోపాటు మలయాళం వంటి రెండు భాషల్లో అమెజాన్ ప్రైమ్‌లో అనుపమ పరమేశ్వరన్, దర్శనా, సంగీత ముగ్గురు హీరోయిన్ల పరదా ఓటీటీ రిలీజ్ అయింది.
