E-Paper
Ram Charan Twins: కవల పిల్లకు నామకరణం చేసిన రామ్ చరణ్, ఉపాసన- చిరంజీవి పేరుతో పాటు లోతైన అర్థం చెప్పిన గ్లోబల్ స్టార్!
మెగా పవర్ స్టార్ రామ్ చరణ్, ఉపాసన దంపతులు తమ కవల పిల్లల పేర్లను ప్రపంచానికి పరిచయం చేశారు. బాబుకు 'శివరామ్', పాపకు 'అన్వీరా దేవి' అని నామకరణం చేసినట్లు రామ్ చరణ్ దంపతులు వెల్లడించారు. ఈ పేర్ల వెనుక ఉన్న ఆధ్యాత్మిక నేపథ్యం, కుటుంబ వారసత్వం గురించి చరణ్ పంచుకున్న విశేషాలు ఇప్పుడు వైరల్ అవుతున్నాయి.
మెగా అభిమానులు ఎప్పుడెప్పుడా అని ఎదురుచూస్తున్న సమయం వచ్చేసింది. జనవరి 31న కవలలకు జన్మనిచ్చిన గ్లోబల్ స్టార్ రామ్ చరణ్-ఉపాసన దంపతులు, తాజాగా తమ చిన్నారుల నామకరణ వేడుకను హైదరాబాద్లోని తమ నివాసంలో అత్యంత సన్నిహితుల మధ్య వైభవంగా నిర్వహించారు. ఈ సందర్భంగా తమ కుమారుడికి 'శివరామ్' అని, కుమార్తెకు 'అన్వీరా దేవి' అని పేరు పెట్టినట్లు ఈ జంట అధికారికంగా ప్రకటించింది.
పేర్ల వెనుక ఉన్న లోతైన అర్థం..
పిల్లల పేర్ల ఎంపిక గురించి రామ్ చరణ్ మాట్లాడుతూ, ఇది కేవలం పేరు పెట్టడం మాత్రమే కాదని, ఒక ఆధ్యాత్మిక నిర్ణయమని పేర్కొన్నారు.
"పిల్లలకు పేర్లు పెట్టడం మా ఇద్దరికీ చాలా వ్యక్తిగతమైన, ఆధ్యాత్మికమైన విషయం. ఈ ప్రయాణంలో మా తల్లిదండ్రుల సూచనలు మాకు ఎంతో కీలకం. మా కుమారుడి పేరు 'శివరామ్'.. ఇది శివుడు, రాముడు అనే ఇద్దరు దేవుళ్ల ఆదర్శాలకు ప్రతిరూపం. అంతేకాకుండా, మా నాన్న (చిరంజీవి) గారి అసలు పేరు 'శివశంకర్ వరప్రసాద్'లోని కొంత భాగాన్ని కూడా ఇది కలిగి ఉంది. ఇది ఆయనపై మాకున్న కృతజ్ఞతకు నిదర్శనం" అని రామ్ చరణ్ వివరించారు.
కుమార్తె పేరు గురించి చెబుతూ.. "'అన్వీరా దేవి' అంటే అపరిమితమైన ధైర్యం, దైవిక శక్తి అని అర్థం. 'వీర' అంటే ధైర్యం, దేవి అంటే శక్తికి చిహ్నం. మా పిల్లలు శక్తివంతంగా, దయతో పెరగాలనే మా ఆకాంక్షకు ఈ పేర్లు ప్రతిరూపాలు" అని రామ్ చరణ్ మురిపెంగా చెప్పుకొచ్చారు.
రెండోసారి మాతృత్వంపై ఉపాసన స్పందన..
ముగ్గురు పిల్లల తల్లిగా తన అనుభూతిని పంచుకుంటూ ఉపాసన ఆసక్తికర వ్యాఖ్యలు చేశారు. "మొదటిసారి (క్లిన్ కారా పుట్టినప్పుడు) అంతా కొత్తగా, కొంచెం గందరగోళంగా అనిపించేది. కానీ, ఈసారి మాతృత్వం చాలా ప్రశాంతంగా, స్పష్టంగా అనిపిస్తోంది. ఇప్పుడు నేను చిన్న చిన్న విషయాలకు కంగారు పడకుండా చాలా రిలాక్స్డ్గా ఉంటున్నాను" అని ఉపాసన తెలిపారు.
"ముగ్గురు పిల్లలను కలిపి చూస్తుంటే కలిగే ఆ తృప్తి వెలకట్టలేనిది. చరణ్ కూడా పిల్లల బాధ్యతల్లో నాకు ఎంతో తోడుగా ఉంటున్నారు. ముఖ్యంగా క్లిన్ కారాను ఆయనే చూసుకుంటున్నారు" అని ఉపాసన కొణిదెల పేర్కొన్నారు.
వారసత్వం అంటే తిరిగి ఇవ్వడమే!
తమ పిల్లలను ఎంతో బాధ్యత గల వ్యక్తులుగా పెంచాలని ఈ దంపతులు లక్ష్యంగా పెట్టుకున్నారు. "మా పిల్లలు సమాజం పట్ల అవగాహనతో, దయతో పెరగాలని ఆశిస్తున్నాము. వారసత్వం అంటే కేవలం ఆస్తులు ఇవ్వడం కాదు, సమాజానికి తిరిగి ఇవ్వడమే నిజమైన వారసత్వం అని మేము నమ్ముతున్నాము" అని ఉపాసన భావోద్వేగంగా పేర్కొన్నారు.
ప్రస్తుతం మెగా కుటుంబంలో సంబరాలు అంబరాన్నంటాయి. క్లిన్ కారా ఇప్పుడు తన తమ్ముడు, చెల్లితో కలిసి ఆడుకుంటున్న వీడియోల కోసం అభిమానులు ఆసక్తిగా ఎదురుచూస్తున్నారు.
