E-Paper
Spider Man 4 Collection: వర్కింగ్ డేస్లోనూ స్పైడీ బాబు హవా.. ఇండియాలో 400 కోట్ల కలెక్షన్స్ దాటేసిన స్పైడర్ మ్యాన్ 4
Spider Man Brand New Day 8 Days Box Office Collection: టామ్ హాలాండ్ హీరోగా వచ్చిన స్పైడర్ మ్యాన్: బ్రాండ్ న్యూ డే మూవీ భారత బాక్సాఫీస్ వద్ద వసూళ్ల వర్షం కురిపిస్తోంది. వర్కింగ్ డేస్లో హవా చాటుతున్న స్పైడర్ మ్యాన్ 4 ఇండియాలో రూ. 400 కోట్లు దాటేసి రికార్డ్ కలెక్షన్స్ సాధించింది.
Spider Man Brand New Day 8 Days Box Office Collection: హాలీవుడ్ సూపర్ హీరో సినిమాలకు మన దేశంలో ఉన్న క్రేజ్ గురించి ప్రత్యేకంగా చెప్పాల్సిన పనిలేదు. ముఖ్యంగా 'స్పైడర్ మ్యాన్' అనగానే థియేటర్ల వద్ద అభిమానుల కోలాహలం వేరే స్థాయిలో ఉంటుంది.
మొదటి రోజు నుంచే స్పైడీ హవా
అదే నిజమని నిరూపిస్తూ టామ్ హాలండ్ నటించిన లేటెస్ట్ మార్వెల్ చిత్రం 'స్పైడర్ మ్యాన్: బ్రాండ్ న్యూ డే' (Spider-Man: Brand New Day) భారత బాక్సాఫీస్ వద్ద కలెక్షన్ల సునామీ సృష్టిస్తోంది. జులై 30న ప్రేక్షకుల ముందుకు వచ్చిన ఈ సినిమా, విడుదలైన మొదటి రోజు నుంచే రికార్డుల వేట మొదలుపెట్టింది.
ఎనిమిదో రోజూ చెక్కుచెదరని హవా!
ట్రేడ్ వర్గాల సమాచారం ప్రకారం, స్పైడర్ మ్యాన్ 4 సినిమా ఎనిమిదో రోజున (గురువారం) ఇండియాలో దాదాపు రూ. 14.20 కోట్ల నెట్ కలెక్షన్స్ రాబట్టింది. బుధవారం (ఆగస్ట్ 5) నాటి వసూళ్లతో పోలిస్తే 17.6 శాతం తగ్గింది. కానీ, వర్కింగ్ డేస్లో కూడా ఈ స్థాయిలో హాలీవుడ్ మూవీ కలెక్షన్స్ సాధించడం విశేషం. దీంతో ఎనిమిది రోజుల్లో భారత బాక్సాఫీస్ వద్ద ఈ చిత్రం మొత్తం గ్రాస్ వసూళ్లు రూ. 400.80 కోట్లకు (నెట్ రూ. 334.80 కోట్లు) చేరుకున్నాయి.
ఎనిమిది రోజుల కలెక్షన్ల వివరాలు (నెట్):
మొదటి రోజు: రూ. 60.60 కోట్లు
రెండో రోజు: రూ. 49.35 కోట్లు
మూడో రోజు: రూ. 70.25 కోట్లు
నాలుగో రోజు: రూ. 77.75 కోట్లు
ఐదో రోజు: రూ. 23.80 కోట్లు
ఆరో రోజు: రూ. 21.50 కోట్లు
ఏడో రోజు: రూ. 17.00 కోట్లు
ఎనిమిదో రోజు: రూ. 14.20 కోట్లు
'యానిమల్' రికార్డుల విధ్వంసం
తొలి వారంలోనే రూ. 334.50 కోట్ల నెట్ వసూళ్లు సాధించిన ఈ స్పైడర్ మ్యాన్ ఫ్రాంచైజీ నాలుగో చిత్రం, రణ్బీర్ కపూర్ 'యానిమల్' సాధించిన మొదటి వారపు కలెక్షన్లను (రూ. 301 కోట్లు) సునాయాసంగా దాటేసింది. మన దేశంలో అత్యధిక ఓపెనింగ్ వీక్ సాధించిన చిత్రాల జాబితాలో 'ధురందర్ 2: ది రివెంజ్' (రూ. 636 కోట్లు), 'పఠాన్' (రూ. 351 కోట్లు), 'జవాన్' (రూ. 348 కోట్లు) తర్వాతీ స్థానంలో నిలిచి సంచలనం సృష్టించింది.
"కేవలం నాలుగు రోజుల్లోనే రూ. 300 కోట్ల మార్కును చేరుకుని, భారతదేశంలో వేగంగా ఈ మైలురాయిని దాటిన హాలీవుడ్ చిత్రంగా 'స్పైడర్ మ్యాన్: బ్రాండ్ న్యూ డే' రికార్డు సృష్టించింది" అని ట్రేడ్ విశ్లేషకులు తెలిపారు.
ప్రాంతీయ భాషల్లోనూ భారీ ఆదరణ!
ఈ చిత్రం కేవలం ఇంగ్లీష్ వెర్షన్కే పరిమితం కాకుండా తెలుగు, హిందీ, తమిళం, మలయాళం, కన్నడ భాషల్లో కూడా ఏకకాలంలో విడుదల కావడం పెద్ద కలిసివచ్చింది. ముఖ్యంగా తెలుగు రాష్ట్రాల్లోనూ, నార్త్ ఇండియాలో హిందీ డబ్బింగ్ వెర్షన్కు ఊహించని రీతిలో రెస్పాన్స్ వస్తోంది.
హైదరాబాద్, విశాఖపట్నం, విజయవాడ వంటి నగరాల్లో ఐమాక్స్, మల్టీప్లెక్స్ స్క్రీన్లు హౌస్ఫుల్ బోర్డులతో దర్శనమిస్తున్నాయి. విడుదలైన ప్రతీ ప్రాంతంలోనూ సరికొత్త రికార్డులు సృష్టిస్తున్న ఈ మార్వెల్ బ్లాక్బస్టర్, రాబోయే రెండో వీకెండ్లో మరిన్ని వసూళ్లు సాధించడం ఖాయంగా కనిపిస్తోంది.
500 కోట్ల వైపుగా స్పైడర్ మ్యాన్
ఇదే జోరు కొనసాగితే త్వరలోనే ఇండియాలో స్పైడర్ మ్యాన్ బ్రాండ్ న్యూ డే సినిమా రూ. 500 కోట్ల కలెక్షన్ల మైలురాయిని దాటినా ఆశ్చర్యపోనవసరం లేదని ట్రేడ్ పండితులు అంచనా వేస్తున్నారు.
