రబీ పంటలకు ఎంఎస్‌పీ పెంపు: నూనెగింజలు, పప్పుధాన్యాలకు ఊరట

ఆరు రబీ పంటల కనీస మద్దతు ధరలను (ఎంఎస్‌పీ) కేంద్ర ప్రభుత్వం పెంచింది. రైతులకు లాభదాయక ధరలు అందించడం, పంటల వైవిధ్యాన్ని ప్రోత్సహించడమే లక్ష్యంగా కుసుమలు, ఆవాలు, పప్పుధాన్యాలకు ప్రభుత్వం అత్యధిక ప్రాధాన్యం ఇచ్చింది.

వచ్చే సీజన్‌కుగాను కేంద్ర ప్రభుత్వం 6 రబీ పంటల కనీస మద్దతు ధరలను (ఎంఎస్‌పీ) పెంచింది. ప్రధానమంత్రి నరేంద్ర మోదీ అధ్యక్షతన సమావేశమైన కేబినెట్ ఆర్థిక వ్యవహారాల కమిటీ (సీసీఈఏ) ఈ ప్రతిపాదనలకు ఆమోదం తెలిపింది. రైతులకు లాభదాయక ఆదాయం అందించడంతో పాటు పప్పుధాన్యాలు, నూనెగింజల వైపు సాగును మళ్లించడమే లక్ష్యంగా ధరలను సవరించారు. ఈ సేకరణ ప్రక్రియ కోసం మొత్తం ₹90,962 కోట్లను కేబినెట్ ఆమోదించింది.

ఏ పంటకు ఎంత పెరిగిందంటే..

రబీ పంటలకు ఎంఎస్‌పీ పెంపు: నూనెగింజలు, పప్పుధాన్యాలకు ఊరట

కొత్త మద్దతు ధరల ప్రకారం నూనెగింజ పంట అయిన కుసుమకు అత్యధికంగా క్వింటాలుకు ₹675 పెంచారు. దీంతో దీని ధర 10.3 శాతం పెరిగి ₹7,215కు చేరింది. ఆవాల ధరను క్వింటాలుకు ₹413 (6.6 శాతం) పెంచి ₹6,613గా నిర్ణయించారు. మసూర్ పప్పు మద్దతు ధరను ₹390 (5.5 శాతం) పెంచడంతో క్వింటాలు ధర ₹7,390కు చేరింది. బార్లీపై ₹136 పెంచి ₹2,286గా, శనగలపై ₹83 పెంచి ₹5,958గా ఖరారు చేశారు.

గోధుమలకు స్వల్ప పెంపు.. కారణమిదే

గోధుమల మద్దతు ధరను మాత్రం చాలా స్వల్పంగా, ఒక శాతం కంటే తక్కువగా పెంచారు. క్వింటాలుకు ₹25 మాత్రమే పెంచడంతో పాత ధర ₹2,585 నుంచి ₹2,610కి చేరింది. కేంద్ర ప్రభుత్వం వద్ద ఇప్పటికే గోధుమ నిల్వలు పుష్కలంగా ఉండటమే ఈ స్వల్ప పెంపునకు కారణమని మార్కెట్ నిపుణులు చెప్తున్నారు. భారతీయ ఆహార సంస్థ (ఎఫ్‌సీఐ) వద్ద సెప్టెంబర్ ప్రారంభంలో ఉన్న గోధుమ నిల్వలు గతేడాదితో పోలిస్తే 44 శాతానికి పైగా పెరిగాయి. 2026-27 రబీ సీజన్‌లో ప్రభుత్వం 35.76 మిలియన్ టన్నుల గోధుమలను సేకరించింది. ఇది అంతకుముందు ఏడాదితో పోలిస్తే 19 శాతానికి పైగా ఎక్కువ. దానికితోడు కొన్ని రాష్ట్రాలు ఎంఎస్‌పీకి అదనంగా బోనస్ ప్రకటిస్తుండటం వల్ల కూడా కేంద్ర సవరణ ప్రభావం పరిమితంగా ఉంటోంది.

ఉత్పత్తి వ్యయం కంటే మెరుగైన లాభం

వాతావరణ అనిశ్చిత పరిస్థితుల నేపథ్యంలో రాబోయే రబీ సీజన్‌కు సిద్ధం కావాలని కేంద్ర ప్రభుత్వం భావిస్తోంది. భూమిలోని తేమ, నీటి లభ్యతను బట్టి పంట ప్రణాళికలు రూపొందించుకోవాలని కేంద్ర వ్యవసాయ శాఖ మంత్రి శివరాజ్ సింగ్ చౌహాన్ రాష్ట్రాలకు సూచించారు. నీటి కొరత ఉన్న ప్రాంతాల్లో తక్కువ నీరు అవసరమయ్యే పప్పుధాన్యాలు, నూనెగింజల సాగుకు ప్రాధాన్యం ఇవ్వాలని ఆయన స్పష్టం చేశారు.