శాఖ నచ్చలేదని మంత్రి పదవికి రామలింగారెడ్డి రాజీనామా

కర్ణాటక కాంగ్రెస్ ప్రభుత్వంలో శాఖల కేటాయింపు తీవ్ర అసంతృప్తికి దారితీసింది. తనకు బెంగళూరు అభివృద్ధి శాఖ ఇవ్వనందుకు నిరసనగా సీనియర్ నేత రామలింగారెడ్డి తన మంత్రి పదవికి రాజీనామా చేశారు.

కర్ణాటక కాంగ్రెస్ ప్రభుత్వంలో శాఖల కేటాయింపుల పంచాయితీ మొదలైంది. ముఖ్యమంత్రి డీకే శివకుమార్ నేతృత్వంలోని నూతన మంత్రివర్గంలో చేరిన రెండు రోజులకే సీనియర్ కాంగ్రెస్ నేత రామలింగారెడ్డి తన మంత్రి పదవికి శుక్రవారం రాజీనామా చేశారు. అయితే, ఆయన కేవలం మంత్రి పదవికి మాత్రమే రాజీనామా చేశానని, పార్టీ సభ్యుడిగా, ఎమ్మెల్యేగా కొనసాగుతానని స్పష్టం చేశారు.

శాఖ నచ్చలేదని మంత్రి పదవికి రామలింగారెడ్డి రాజీనామా

ముఖ్యమంత్రి డీకే శివకుమార్ తనకు బెంగళూరు అభివృద్ధి శాఖ (Bengaluru Development Department) కేటాయిస్తానని ముందే హామీ ఇచ్చారని, కానీ ఆ మాట తప్పి ఆ శాఖను కృష్ణ బైరేగౌడకు అప్పగించడంతో రామలింగారెడ్డి తీవ్ర అసంతృప్తికి లోనయ్యారు. తనకు జరిగిన అన్యాయంపై ఆయన బహిరంగంగానే ఆవేదన వ్యక్తం చేశారు.

"నన్ను పదే పదే అవమానించారు, ఇకపై దీనిని భరించలేను. నేను పార్టీపై కోపంగా లేను, కేవలం తీవ్ర నిరాశకు గురయ్యాను" అని 53 ఏళ్లుగా కాంగ్రెస్‌లోనే కొనసాగుతున్న రామలింగారెడ్డి వ్యాఖ్యానించారు.

సర్దుబాటు చేసే పనిలో సీఎం డీకే శివకుమార్

రామలింగారెడ్డి రాజీనామాపై ముఖ్యమంత్రి డీకే శివకుమార్ స్పందిస్తూ, ఈ వివాదాన్ని త్వరలోనే సర్దుబాటు చేస్తామని నమ్మకం వ్యక్తం చేశారు.

"ఆందోళన చెందాల్సిన అవసరం లేదు. రామలింగారెడ్డి నాకు మంచి మిత్రుడు. క్యాబినెట్‌లో మేమిద్దరం అత్యంత ఆప్తులం. త్వరలోనే ఈ సమస్యను పరిష్కరిస్తాం" అని డీకే శివకుమార్ పేర్కొన్నారు.

బెంగళూరు రాజకీయాల్లో రామలింగారెడ్డి అత్యంత ప్రభావవంతమైన, పట్టున్న నాయకుడు. రాబోయే గ్రేటర్ బెంగళూరు అథారిటీ (GBA) ఎన్నికల నేపథ్యంలో ఆయన మంత్రి పదవి నుంచి తప్పుకోవడం కాంగ్రెస్ పార్టీకి రాజకీయంగా పెద్ద చర్చనీయాంశంగా మారింది. కాగా, తన రాజీనామా పత్రాన్ని ఆయన నేరుగా ముఖ్యమంత్రికి ఇవ్వకుండా, తన వ్యక్తిగత కార్యదర్శి ద్వారా ముఖ్యమంత్రి కార్యాలయానికి (CMO) పంపించారు.