సోయాబీన్: శాఖాహారంలో ప్రొటీన్ల విషయానికి వస్తే సోయాబీన్ మొదటి స్థానంలో నిలుస్తుంది. ఇండియన్ కౌన్సిల్ ఆఫ్ మెడికల్ రీసెర్చ్ (ICMR-IFCT) నివేదికల ప్రకారం.. 100 గ్రాముల పొడి సోయాబీన్‌లో ఏకంగా 36 గ్రాముల ప్రొటీన్ లభిస్తుంది. మాంసాహారంలో లభించే అత్యవసరమైన అమినో యాసిడ్లన్నీ సోయాలో ఉండటం దీని ప్రత్యేకత. సోయా చంక్స్, సోయా పాలు లేదా టోఫు రూపంలో దీన్ని రోజువారీ ఆహారంలో భాగం చేసుకోవచ్చు.
మసూర్ పప్పు : మన రోజువారీ వంటకాల్లో వాడే మసూర్ పప్పులోనూ ప్రొటీన్లు సమృద్ధిగా ఉంటాయి. 100 గ్రాముల పొడి మసూర్ పప్పులో సుమారు 24 నుంచి 25 గ్రాముల ప్రొటీన్ ఉంటుంది. అయితే పప్పు ఉడికిన తర్వాత నీటిని పీల్చుకోవడం వల్ల దాని బరువు పెరుగుతుంది కాబట్టి, పొడి పప్పు లెక్కలనే ప్రామాణికంగా తీసుకోవాల్సి ఉంటుంది.
కందిపప్పు: తెలుగువారి ఇళ్లలో రోజూ చేసుకునే పప్పు వంటకాల్లో కందిపప్పుదే ప్రధాన పాత్ర. 100 గ్రాముల పచ్చి కందిపప్పులో దాదాపు 21 నుంచి 22 గ్రాముల ప్రొటీన్ లభిస్తుంది. సాంబార్, పప్పుచారు లేదా ముద్దపప్పు రూపంలో నిత్యం తీసుకునే ఈ కందిపప్పు శాఖాహారులకు చక్కటి పోషణను అందిస్తుంది.
పనీర్: శాఖాహారులకు అత్యంత సులభంగా అందుబాటులో ఉండే పోషకాహారం పనీర్. 100 గ్రాముల పనీర్‌లో సుమారు 18.9 గ్రాముల ప్రొటీన్ ఉంటుంది. పనీర్ భుర్జీ, టిక్కా, పనీర్ కూరలు లేదా పరాఠాల రూపంలో పిల్లల నుంచి పెద్దల వరకు అందరూ దీన్ని ఇష్టంగా తింటారు. రోజువారీ డైట్‌లో ప్రొటీన్ పెంచుకోవడానికి పనీర్ సరైన ఎంపిక.
రాజ్మా (కిడ్నీ బీన్స్): ఉత్తరాదినే కాకుండా ఇప్పుడు మన దగ్గర కూడా ఎంతో ప్రాచుర్యం పొందిన రాజ్మాలో ప్రొటీన్లతో పాటు ఫైబర్ (పీచు పదార్థం) పుష్కలంగా ఉంటుంది. 100 గ్రాముల ఎండిన రాజ్మా గింజల్లో దాదాపు 20 గ్రాముల ప్రొటీన్ ఉంటుంది. ఇది జీర్ణక్రియను మెరుగుపరచడమే కాకుండా పొట్ట నిండిన భావనను కలిగిస్తుంది.