E-Paper
నేటి నుంచి నిజ జ్యేష్ఠ మాసం.. ఈ నెలలో చేయాల్సినవి, చేయకూడనివి తెలుసుకోండి!
అధిక జ్యేష్ఠ మాసం ముగియడంతో నేటి నుంచి నిజ జ్యేష్ఠ మాసం ప్రారంభమైంది. హిందూ సంప్రదాయంలో అత్యంత పవిత్రమైన ఈ మాసంలో దానధర్మాలు, ఉపవాసాలు, దేవతారాధనలు చేయడం వల్ల విశేష పుణ్యఫలాలు లభిస్తాయని శాస్త్రాలు చెబుతున్నాయి. జ్యేష్ఠ మాసంలో నీటి దానం, నువ్వుల దానం శుభప్రదంగా భావిస్తారు.
ఈ ఏడాది అధిక జ్యేష్ఠ మాసం వలన జ్యేష్ఠ మాసం 60 రోజులు వచ్చింది అధిక జ్యేష్ఠ మాసం నిన్న అధిక జ్యేష్ఠ అమావాస్యతో పూర్తయిపోయింది. ఈరోజు నుంచి నిజ జ్యేష్ఠ మాసం మొదలైంది. హిందూ క్యాలెండర్ ప్రకారం చూసినట్లయితే ఇది మూడవ నెల. ఉత్తరాది వారికి జ్యేష్ఠ మాసంలో కొన్ని పనులు చేయడం వలన జాతక దోషాలు తొలగిపోతాయి. ఈ నెల రోజులు కూడా జ్యేష్ఠ మాసానికి సంబంధించిన పరిహారాలను పాటించొచ్చు. ఈరోజు జ్యేష్ఠ మాసంలో చేయాల్సిన పనులతో పాటు, జ్యేష్ఠ మాసం పేరు ఎలా వచ్చిందో పూర్తి వివరాలు తెలుసుకుందాం.
జ్యేష్ఠ మాసం చాలా ఫలితమైనది
జ్యేష్ఠ మాసాన్ని చాలా ఫలితమైనదిగా భావిస్తారు. ఈ నెలలో దానధర్మాలు చేయడం వలన ఎంతో పుణ్యం కలుగుతుంది. అలాగే ఈ నెలలో చేసే ఉపవాసాలు కూడా ఎన్నో శుభ ఫలితాలను తీసుకువస్తాయి.
జ్యేష్ఠ మాసం అనే పేరు ఎలా వచ్చింది?
జ్యేష్ఠ మాసంలో ఇతర నెలల కంటే పగలు ఎక్కువగా, రాత్రి తక్కువగా ఉంటుంది. ఎక్కువ పొడవు ఉన్న దానినే సంస్కృతంలో "జ్యేష్ఠ" అంటారు. అందుకనే ఈ నెలకు జ్యేష్ఠ మాసం అని పేరు వచ్చింది. జ్యేష్ఠ మాసానికి అధిపతి కుజుడు.
జ్యేష్ఠ మాసంలో ఈ పనులు చేస్తే చాలా మంచిది
జ్యేష్ఠ మాసంలో స్నానాలకు, దానధర్మాలకు ఎంతో శుభ ఫలితం వస్తుంది. ఈ నెలలో కొన్ని నియమాలను కూడా పాటిస్తే మంచిది.
జ్యేష్ఠ మాసంలో నీటిని దానం చేస్తే ఎంతో పుణ్యం వస్తుంది.
సూర్యోదయానికి ముందు స్నానం చేసి సూర్యుని పూజించి అర్ఘ్యం సమర్పిస్తే శుభ ఫలితాలు కలుగుతాయి.
అలాగే ఈ నెలలో పగటి పూట నిద్రపోకూడదు. ఏదైనా అనారోగ్య సమస్య ఉంటే కాసేపు నిద్రపోవచ్చు.
ఈ నెలలో నువ్వులను దానం చేస్తే చాలా మంచి జరుగుతుంది. జ్యేష్ఠ మాసంలో మొక్కలు, జంతువులు, పక్షులకు సేవ చేయడం కూడా శుభ ఫలితాలను తీసుకొస్తుంది. కుండలో నీటి దానం చేయడం వలన ఉత్తమ ఫలితాలను పొందవచ్చు.
జ్యేష్ఠ మాసానికి అధిపతి కుజుడు కాబట్టి ఈ నెలలో హనుమంతుని ఆరాధిస్తే మరిన్ని శుభ ఫలితాలను పొందవచ్చు.
కొన్ని పొరపాట్లు చేయడం వలన ఇబ్బందులు వస్తాయి
జ్యేష్ఠ మాసంలో కారంగా ఉండే ఆహార పదార్థాలను, వెల్లుల్లిని తినకూడదు.
వంకాయ తినడం కూడా నిషేధించబడింది. ఇది పిల్లలకు హాని చేస్తుందని అంటారు.
ఆయుర్వేదం ప్రకారం జ్యేష్ఠ మాసంలో శరీరంలో వాత, వేడి పెరుగుతాయట. కాబట్టి వాతావరణానికి తగ్గట్టుగా ఆహార పదార్థాలను తీసుకోవాలి.
జ్యేష్ఠ మాసంలో ఇలా చేస్తే మంచిది
జ్యేష్ఠ మాసం బ్రహ్మదేవుడికి ఇష్టమైన నెల. ఈ నెలలో గోధుమపిండితో బ్రహ్మదేవుని ప్రతిమ చేసి పూజిస్తే విశేషమైన ఫలితాలను పొందవచ్చు. అలాగే విష్ణు సహస్రనామ పారాయణం చేస్తే అనంత ఫలితాన్ని పొందవచ్చు. జ్యేష్ఠ మాసంలో జలదానం చేయడం కూడా ఉత్తమ ఫలితాలను అందిస్తుంది.
మహా జ్యేష్ఠి
జ్యేష్ఠ పూర్ణిమను మహా జ్యేష్ఠి అంటారు. ఆ రోజున నువ్వులను దానం చేస్తే అశ్వమేధ యాగం చేసినంత ఫలితం వస్తుంది. గొడుగు, చెప్పులను దానం చేస్తే కూడా మంచిది. ఐశ్వర్య ప్రాప్తి కలుగుతుంది. కలశం, జలం, గంధం వంటివి దానం చేస్తే కూడా మంచిది. జ్యేష్ఠ శుద్ధ ద్వాదశిని దశహరా అని అంటారు. దుర్దశలను పోగొట్టే శక్తి దీనికి ఉంది. ఆ రోజున నదీ స్నానాలు చేస్తే శుభ ఫలితాలు కలుగుతాయి. అలాగే జ్యేష్ఠ మాసంలో వచ్చే ఏకాదశి రోజు విష్ణువును ఆరాధించి ఉపవాసం ఉంటే కూడా మంచి ఫలితాలు లభిస్తాయి.
