E-Paper
హైదరాబాద్లో కేంద్ర ప్రభుత్వ ఉద్యోగాలు.. జులై 22 వరకు అప్లికేషన్, మంచి జీతం!
సెంట్రల్ వేర్హౌసింగ్ కార్పొరేషన్(CWC) హైదరాబాద్తో సహా వివిధ ప్రాంతాలలో 6 యంగ్ ప్రొఫేషనల్ నియామకం కోసం ఒక నోటిఫికేషన్ను విడుదల చేసింది. జులై 22, 2026 వరకు దరఖాస్తు చేసుకోవచ్చు.
ప్రభుత్వ రంగ సంస్థలో ఉద్యోగం సాధించాలనుకునే నిరుద్యోగులకు, ముఖ్యంగా హైదరాబాద్లో కావాలనుకునే యువతకు ఒక శుభవార్త. భారత ప్రభుత్వ వినియోగదారుల వ్యవహారాలు, ఆహారం మరియు ప్రజా పంపిణీ మంత్రిత్వ శాఖ పరిధిలోని నవరత్న సీపీఎస్ఈ (CPSE) సంస్థ అయిన సెంట్రల్ వేర్హౌసింగ్ కార్పొరేషన్ (CWC) వివిధ విభాగాలలో యంగ్ ప్రొఫెషనల్ పోస్టుల భర్తీకి నోటిఫికేషన్ విడుదల చేసింది.
మొత్తం 6 పోస్టులకు గాను ఈ నోటిఫికేషన్ జారీ చేయగా, అందులో హైదరాబాద్ రీజినల్ ఆఫీస్ పరిధిలోనే 2 పోస్టులు ఉండటం గమనార్హం. అర్హత, ఆసక్తి గల అభ్యర్థులు ఆన్లైన్ ద్వారా దరఖాస్తు చేసుకోవచ్చు. హైదరాబాద్ యువతకు ప్రాధాన్యత ఉండేలా మార్కెటింగ్ విభాగంలో ఈ ఖాళీలను భర్తీ చేస్తున్నారు. పోస్టు పేరు యంగ్ ప్రొఫెషనల్ (మార్కెటింగ్ & బిజినెస్ డెవలప్మెంట్). హైదరాబాద్లో ఖాళీల సంఖ్య 02. కాంట్రాక్ట్ కాలపరిమితి చూసుకుంటే మొదట రెండేళ్ల కాలానికి తీసుకుంటారు. ప్రతిభ ఆధారంగా దీనిని మరో ఏడాది పొడిగించే అవకాశం ఉంది.
గుర్తింపు పొందిన విశ్వవిద్యాలయం లేదా సంస్థ నుండి జనరల్ మేనేజ్మెంట్/ మార్కెటింగ్/ లాజిస్టిక్స్/ సప్లై చైన్ మేనేజ్మెంట్/ సేల్స్ & మార్కెటింగ్ మేనేజ్మెంట్లో రెండేళ్ల పూర్తి కాలపు రెగ్యులర్ పోస్ట్ గ్రాడ్యుయేట్ డిప్లొమా (PGDM) లేదా పోస్ట్ గ్రాడ్యుయేట్ డిగ్రీ (MBA) ఉత్తీర్ణులై ఉండాలి. వేర్హౌసింగ్ లేదా లాజిస్టిక్స్ రంగంలో (ప్రభుత్వ/ ప్రైవేట్/ కమర్షియల్ సంస్థల్లో) 0 నుండి 3 ఏళ్లు లేదా అంతకంటే ఎక్కువ అనుభవం ఉన్నవారు అర్హులు.
హైదరాబాద్తో పాటు దేశంలోని ఇతర ప్రాంతాలలో ఉన్న ఖాళీల వివరాలు చూసుకుంటే.. యంగ్ ప్రొఫెషనల్ (లర్నింగ్ అండ్ డెవలప్మెంట్) - 01 పోస్టు (న్యూఢిల్లీ), యంగ్ ప్రొఫెషనల్ (PCS మార్కెటింగ్) - 01 పోస్టు (పాట్నా), యంగ్ ప్రొఫెషనల్ (మార్కెటింగ్ అండ్ బిజినెస్ డెవలప్మెంట్) - 02 పోస్టులు (జైపూర్)లో ఉన్నాయి.
0 నుండి 3 ఏళ్ల లోపు అనుభవం ఉన్నవారికి రూ. 50,000 (ఫిక్స్డ్), 3 ఏళ్ల కంటే ఎక్కువ అనుభవం ఉన్నవారికి రూ. 60,000(ఫిక్స్డ్), అధికారిక పర్యటనల సమయంలో నిబంధనల ప్రకారం టీఏ/డీఏ, లాడ్జింగ్ ఛార్జీలు లభిస్తాయి.
దరఖాస్తులు 09 జూలై 2026 ప్రారంభమయ్యాయి. చివరి తేదీ 22 జూలై 2026 (రాత్రి 11:59 గంటల వరకు) ఉంది. అభ్యర్థులు మరిన్ని వివరాల కోసం, అప్లై చేయడానికి https://cwceportal.com/ వెబ్సైట్ను సందర్శించవచ్చు.
