Telangana AP SIR : తెలంగాణ, ఏపీలో ‘సర్‌’ గడువు పొడిగింపు - కొత్త తేదీలివే

తెలంగాణ, ఏపీ సహా ఆరు రాష్ట్రాలు, కేంద్రపాలిత ప్రాంతాల్లో ప్రత్యేక ఓటర్ల జాబితా సవరణ గడువును కేంద్ర ఎన్నికల సంఘం పొడిగించింది. ఈ మేరకు వివరాలను పేర్కొంది.

తెలంగాణ, ఆంధ్రప్రదేశ్, మహారాష్ట్ర, ఢిల్లీ, హర్యానా, నాగాలాండ్ రాష్ట్రాల్లో ఓటర్ల జాబితా ప్రత్యేక సమగ్ర సవరణ (ఎస్ఐఆర్) కార్యక్రమానికి సంబంధించి కేంద్ర ఎన్నికల సంఘం కీలక నిర్ణయం తీసుకుంది. ఆయా రాష్ట్రాల సీఈఓల అభ్యర్థన మేరకు ఈ ఓటర్ల జాబితా సవరణ షెడ్యూల్‌ను సవరిస్తూ ఈసీ ఆదేశాలు జారీ చేసింది.

సర్ గడువు పొడిగింపు

ఈ మేరకు గడువు పెంపు వివరాలను తెలియజేస్తూ ఐదు రాష్ట్రాలు, కేంద్రపాలిత ప్రాంతమైన ఢిల్లీ ముఖ్య ఎన్నికల అధికారులకు (సీఈఓ) ఎన్నికల సంఘం వేర్వేరుగా లేఖలు రాసింది. వివిధ సాంకేతిక, పరిపాలనా కారణాల వల్ల గతంలోనూ పలుమార్లు ఈ ప్రత్యేక సమగ్ర సవరణ గడువును పొడిగించిన సంగతి తెలిసిందే.

రాష్ట్రాల వారీగా కొత్త షెడ్యూల్ వివరాలు :

మహారాష్ట్రలో ఓటర్ల నమోదు, అభ్యంతరాలు, ఫిర్యాదుల దాఖలు గడువును అక్టోబరు 26 నుంచి నవంబరు 13 వరకు పొడిగించారు. నోటీసుల జారీ, ఫిర్యాదుల పరిష్కార ప్రక్రియ నవంబరు 25 వరకు కొనసాగుతుంది. తుది ఓటర్ల జాబితాను నవంబరు 30న ప్రచురించనున్నారు. నిజానికి ఇక్కడ ఆగస్టు 31న ముసాయిదా ఓటర్ల జాబితాను విడుదల చేయగా, క్లెయిమ్‌ల పరిష్కారానికి గతంలో నవంబరు 10ని ఆఖరి తేదీగా నిర్ణయించారు.

దేశ రాజధాని ఢిల్లీలో అభ్యంతరాలు, దరఖాస్తుల స్వీకరణ గడువును అక్టోబరు 30 నుంచి నవంబరు 25 వరకు పొడిగించారు. దరఖాస్తుల పరిష్కార గడువును నవంబరు 30 నుంచి డిసెంబరు 15కి మార్చారు. అన్ని పరిశీలనల అనంతరం డిసెంబరు 22న తుది ఓటర్ల జాబితాను విడుదల చేస్తారు.