IRCTC Arunachalam Tour : హైదరాబాద్ - అరుణాచలం టూర్ ప్యాకేజీ - లిస్టులో పాండిచేరి..! ధరలివే

IRCTC Hyderabad Arunachalam Tour Package : హైదరాబాద్ నుంచి అరుణాచలం, కాంచీపురం, పాండిచేరి వెళ్లేందుకు ఐఆర్సీటీసీ టూరిజం ప్యాకేజీని ప్రకటించింది. 'అరుణాచల మోక్ష యాత్ర' పేరుతో బడ్జెట్ ధరలోనే అందుబాటులోకి తీసుకువచ్చింది. పూర్తి వివరాలను ఇక్కడ తెలుసుకోండి….

Hyderabad to Arunachalam Tour Package : తెలుగు రాష్ట్రాల నుంచి తమిళనాడులోని ప్రముఖ ఆధ్యాత్మిక క్షేత్రమైన అరుణాచలానికి వెళ్లే భక్తుల సంఖ్య రోజురోజుకూ పెరుగుతోంది. ముఖ్యంగా అరుణాచలంలో గిరిప్రదక్షిణ చేసేందుకు భావోద్వేగంతో కూడిన ఆధ్యాత్మిక ఆసక్తిని భక్తులు కనబరుస్తున్నారు. ఈ నేపథ్యంలో ఐఆర్సీటీసీ టూరిజం… 'అరుణాచల మోక్ష యాత్ర' (ప్యాకేజీ కోడ్: SHR107) పేరుతో ప్రత్యేక టూర్ ప్యాకేజీని అందిస్తోంది.

అరుణాచలం (Image HT Telugu )

ఈ ప్యాకేజీ ద్వారా అరుణాచల శివక్షేత్రం మాత్రమే కాకుండా ఆధ్యాత్మికం, పర్యాటకం కలగలిసిన కాంచీపురంతో పాటు పాండిచేరి ప్రాంతాలను కూడా సందర్శించవచ్చు. ప్రస్తుతం నవంబర్ 13వ తేదీన జర్నీ అందుబాటులో ఉంది. అయితే ఆసక్తి గల టూరిస్టులు ముందుగానే టికెట్లు బుకింగ్ చేసుకోవాలి. ఈ టూర్ ప్యాకేజీ మొత్తం 4 రాత్రులు, 5 రోజుల పాటు సాగుతుంది. సికింద్రాబాద్ పరిధిలోని కాచిగూడ రైల్వే స్టేషన్ నుంచి ప్రయాణం ప్రారంభమవుతుంది.

5 రోజుల టూర్ షెడ్యూల్ :

• మొదటి రోజు : కాచిగూడ రైల్వే స్టేషన్ నుంచి సాయంత్రం 5:00 గంటలకు రైలు నంబరు 17653 (కాచిగూడ - పుదుచ్చేరి ఎక్స్‌ప్రెస్) ద్వారా ప్రయాణం ప్రారంభమవుతుంది. రాత్రంతా రైలు ప్రయాణం ఉంటుంది.
• రెండో రోజు : ఉదయం 11:05 గంటలకు పుదుచ్చేరి(పాండిచేరి) స్టేషన్ చేరుకుంటారు. హోటల్‌లో చెకిన్ అయిన తర్వాత ఆరోవిల్, శ్రీ అరబిందో ఆశ్రమం, ప్యారడైజ్ బీచ్ సందర్శిస్తారు. ఆ రాత్రి పుదుచ్చేరిలోనే బస చేస్తారు.
• మూడో రోజు : ఉదయం హోటల్లో టిఫిన్ ముగించుకుని తిరువణ్ణామలై (అరుణాచలం) వైపు (120 కి.మీ) బయలుదేరుతారు. అక్కడ హోటల్‌లో చెకిన్ అయిన అనంతరం అరుణాచలేశ్వర ఆలయాన్ని, గిరిప్రదక్షిణను తమ వీలును బట్టి పూర్తి చేసుకోవచ్చు. రాత్రి తిరువణ్ణామలైలోనే బస చేస్తారు.
• నాలుగో రోజు : ఉదయం టిఫిన్ తర్వాత చెకౌట్ అయి కాంచీపురం (120 కి.మీ) వెళ్తారు. కామాక్షి అమ్మవారి ఆలయం, ఏకాంబరేశ్వర ఆలయాన్ని దర్శించుకుంటారు. సాయంత్రం అరక్కోణం స్టేషన్ (30 కి.మీ) చేరుకుని, సాయంత్రం 6:05 గంటలకు రైలు నంబరు 17651 ఎక్కి తిరుగు ప్రయాణమవుతారు.
• ఐదో రోజు (మంగళవారం) : ఉదయం 7:50 గంటలకు కాచిగూడ స్టేషన్‌కు చేరుకోవడంతో యాత్ర పూర్తవుతుంది.

ఆసక్తి గల టూరిస్టులు IRCTC అధికారిక వెబ్‌సైట్ https://www.irctctourism.com/ ద్వారా నేరుగా టికెట్లు బుక్ చేసుకోవచ్చు. రాబోయే నవంబర్ 13, 2026 ప్రయాణ తేదీకి సంబంధించి బుకింగ్స్ అందుబాటులో ఉన్నాయి. ఇది వెబ్ సైట్ లో ఇతర టూర్ ప్యాకేజీల వివరాలను తెలుసుకోవచ్చు.