హైదరాబాద్‌లో భారీగా కల్తీ మసాలా దినుసులు సీజ్.. మెుత్తం 25,300 కేజీలు

హైదరాబాద్‌లో భారీగా కల్తీ మసాలా దినుసులను పట్టుకున్నారు అధికారులు. వాటిని చూస్తే.. నిజమైన వాటిలాగానే కనిపిస్తున్నా.. అందులో కలిపిన రసాయనాలు ఆరోగ్యాన్ని బాగా దెబ్బతీస్తాయి.

గ్రేటర్ హైదరాబాద్ పరిధిలో ప్రజారోగ్యంతో చెలగాటమాడుతున్న కల్తీ రాయుళ్లపై పోలీసులు, జీహెచ్‌ఎంసీ అధికారులు ఉక్కుపాదం మోపారు. హైదరాబాద్ ఫుడ్ అడల్టరేషన్ సర్వైలెన్స్ టీమ్ (H-FAST), జీహెచ్‌ఎంసీ ఆహార భద్రతా విభాగం సంయుక్తంగా నిర్వహించిన భారీ తనిఖీల్లో ఏకంగా 25,300 కిలోలకు పైగా కల్తీ మసాలా దినుసులను అధికారులు స్వాధీనం చేసుకున్నారు. ఈ ఆపరేషన్‌కు సంబంధించిన వివరాలను హైదరాబాద్ నగర పోలీస్ కమిషనర్ వి.సి. సజ్జనార్ విలేకరుల సమావేశంలో వెల్లడించారు.

కల్తీ మసాలా దినుసులు సీజ్

మసాలా దినుసులు ఆకర్షణీయంగా కనిపించేందుకు, వాటి బరువును కృత్రిమంగా పెంచేందుకు వ్యాపారులు అత్యంత ప్రమాదకరమైన పదార్థాలను వినియోగిస్తున్నట్లు అధికారులు గుర్తించారు. దుస్తులకు వేసే కలర్లు, ఇండస్ట్రియల్ రంగులు, పౌడర్, సింథటిక్ రంగులను విస్తృతంగా వాడారు. నాణ్యత లేని దినుసుల రూపురేఖలను మార్చి ప్రకాశవంతంగా చూపించడం, తక్కువ ఖర్చుతో ఎక్కువ బరువు వచ్చేలా చేసి అధిక లాభాలు గడించడం చేస్తుంటారు కల్తీ రాయుళ్లు.

అధికారులు జరిపిన మెరుపు దాడుల్లో లభ్యమైన కల్తీ మసాలా దినుసులు, వాటి పరిమాణం భారీ మెుత్తంలో ఉంది. వాము 7,920 కేజీలు, జీలకర్ర 6,700 కేజీలు, ఆవాలు 4,960 కేజీలు, జీలకర్ర పొడి/డస్ట్ 2,350 కేజీలు, షాజీరా 2,280 కేజీలు, లవంగాలు 550 కేజీలు, సోంప్ 540 కేజీలు.. అంతేకాకుండా ఈ కల్తీ దినుసుల తయారీకి ఉపయోగించే 89,150 కిలోల రా మెటీరియల్‌ను (రసాయనాలు, రంగులు మొదలైనవి) కూడా పోలీసులు స్వాధీనం చేసుకున్నారు.

ప్రాణాంతకమైన ఫ్యాబ్రిక్ డైలు, కెమికల్స్ కలిపిన ఆహార పదార్థాలను తీసుకోవడం వల్ల క్యాన్సర్, కిడ్నీ వ్యాధులు, కాలేయ సమస్యలు, జీర్ణకోశ సంబంధిత తీవ్ర రుగ్మతలు వస్తాయని ఆరోగ్య నిపుణులు హెచ్చరిస్తున్నారు. ఇలాంటి అక్రమ వ్యాపారాలకు పాల్పడే వారిపై పిడి యాక్ట్ నమోదు చేయడంతో పాటు కఠిన చట్టపరమైన చర్యలు తీసుకుంటామని నగర సీపీ వి.సి. సజ్జనార్ స్పష్టం చేశారు. నగరంలో ఆహార కల్తీని అరికట్టేందుకు H-FAST బృందాలు నిరంతరం తనిఖీలు నిర్వహిస్తాయని, కల్తీ సమాచారం తెలిస్తే ప్రజలు వెంటనే పోలీసులకు లేదా జీహెచ్‌ఎంసీ ఫుడ్ సేఫ్టీ విభాగానికి ఫిర్యాదు చేయాలని కోరారు.