దసరా, బతుకమ్మ, నవరాత్రి పండుగల వేళ ప్రయాణికుల రద్దీని దృష్టిలో ఉంచుకుని దక్షిణ మధ్య రైల్వే ప్రయాణికులకు బిగ్ రిలీఫ్ ఇచ్చింది. హైదరాబాద్, సికింద్రాబాద్ నుంచి సిర్పూర్ కాగజ్నగర్ మధ్య నడిచే పండుగ ప్రత్యేక రైళ్లకు యాదాద్రి (యాదగిరిగుట్ట) రైల్వే స్టేషన్‌లో అదనపు స్టాపేజ్ కల్పిస్తున్నట్లు ప్రకటించింది.
పండుగ రోజుల్లో యాదాద్రి శ్రీ లక్ష్మీనరసింహస్వామి దర్శనానికి వెళ్లే భక్తులతో పాటు, సొంత ఊళ్లకు ప్రయాణమయ్యే వేలాది మంది ప్రయాణికుల సౌకర్యార్థం దక్షిణ మధ్య రైల్వే ఈ నిర్ణయం తీసుకుంది. ఈ అదనపు ప్రయోగాత్మక స్టాపేజ్ సౌకర్యం అక్టోబర్ 25, 2026 వరకు అందుబాటులో ఉంటుంది.
34 డైలీ సర్వీసులు…
పండుగ రద్దీని తట్టుకునేందుకు సికింద్రాబాద్ - సిర్పూర్ కాగజ్నగర్ - హైదరాబాద్ మార్గంలో మొత్తం 34 డైలీ ఫెస్టివల్ స్పెషల్ సర్వీసులను రైల్వే శాఖ ఇప్పటికే ప్రకటించింది. వీటిలో రైలు నంబర్ 07711 మరియు 07712 సర్వీసులు ఉన్నాయి.
- రైలు నంబర్ 07711 (సికింద్రాబాద్ – సిర్పూర్ కాగజ్నగర్) : ఈ ప్రత్యేక రైలు మధ్యాహ్నం 12:10 గంటలకు సికింద్రాబాద్‌లో బయలుదేరి చర్లపల్లి (12:30/12:32), భోంగీర్ (12:59/13:00) మీదుగా మధ్యాహ్నం 13:09 గంటలకు యాదాద్రి చేరుకుంటుంది. అక్కడ ఒక నిమిషం పాటు ఆగిన తర్వాత 13:10 గంటలకు బయలుదేరుతుంది. ఆ తర్వాత జనగామ, కాజీపేట, జమ్మికుంట, పెద్దపల్లి, రామగుండం, మంచిర్యాల, బెల్లంపల్లి, ఆసిఫాబాద్ రోడ్ మీదుగా సాయంత్రం 17:30 గంటలకు సిర్పూర్ కాగజ్నగర్ చేరుకుంటుంది.
- రైలు నంబర్ 07712 (సిర్పూర్ కాగజ్నగర్ – హైదరాబాద్) : తిరుగు ప్రయాణంలో ఈ రైలు సిర్పూర్ కాగజ్‌నగర్‌లో సాయంత్రం 18:00 గంటలకు బయలుదేరి రాత్రి 21:39 గంటలకు యాదాద్రి స్టేషన్‌కు చేరుకుంటుంది. 21:40 గంటలకు అక్కడి నుంచి బయలుదేరి భువనగిరి, చర్లపల్లి, సికింద్రాబాద్ మీదుగా రాత్రి 23:15 గంటలకు హైదరాబాద్ నాంపల్లి చేరుకుంటుంది. అక్టోబర్ 9 నుంచి 25 వరకు ప్రతిరోజూ నడిచే ఈ 17 జతల (మొత్తం 34) ప్రత్యేక రైళ్ల సర్వీసులను ప్రయాణికులు, ఆధ్యాత్మిక భక్తులు సద్వినియోగం చేసుకోవాలని దక్షిణ మధ్య రైల్వే కోరింది.