వరుస పండుగల వేళ సొంతూర్లకు వెళ్లే ప్రయాణికులకు దక్షిణ రైల్వే గుడ్ న్యూస్ చెప్పింది. రాబోయే దసరా, దీపావళి పూజా పండుగల సందర్భంగా పెరిగే తీవ్ర ప్రయాణికుల రద్దీని నియంత్రించేందుకు ప్రత్యేక రైళ్లను (ట్రెయిన్స్ ఆన్ డిమాండ్) నడుపుతున్నట్లు ప్రకటించింది.
తమిళనాడులోని పోదనూర్ జంక్షన్ నుంచి బీహార్‌లోని బరౌని మధ్య ప్రత్యేక రైళ్లు సర్వీసులను అందుబాటులోకి తీసుకువచ్చింది. ఈ ప్రత్యేక రైలు సర్వీసులకు సంబంధించి అక్టోబర్ 14న ఉదయం 8.00 గంటల నుంచే దక్షిణ రైల్వే పరిధిలో అడ్వాన్స్ బుకింగ్స్ ప్రారంభమయ్యాయి. పండుగ సమయంలో ప్రయాణించాలనుకునే ప్రయాణికులు ఐఆర్‌సీటీసీ (IRCTC) వెబ్‌సైట్, యాప్ లేదా రైల్వే రిజర్వేషన్ కౌంటర్ల ద్వారా టికెట్లను బుక్ చేసుకోవచ్చని అధికారులు వెల్లడించారు.
ట్రైన్ టైమింగ్స్ - వివరాలు
- రైలు నంబర్ 06139 (పోదనూర్ - బరౌని ఎక్స్‌ప్రెస్ స్పెషల్): అక్టోబర్ 16వ తేదీ శుక్రవారం ఉదయం 06.15 గంటలకు పోదనూర్ వద్ద బయలుదేరుతుంది. ఇది మూడో రోజు (ఆదివారం) మధ్యాహ్నం 13.30 గంటలకు బరౌని చేరుకుంటుంది.
- రైలు నంబర్ 06140 (బరౌని - పోదనూర్ ఎక్స్‌ప్రెస్ స్పెషల్) : అక్టోబర్ 19వ తేదీ సోమవారం ఉదయం 09.30 గంటలకు బరౌనిలో బయలుదేరుతుంది. ఇది మూడో రోజు (బుధవారం) సాయంత్రం 18.30 గంటలకు పోదనూర్ చేరుకుంటుంది.
ఈ రెండు మార్గాల్లోనూ చెరొక సర్వీసును మాత్రమే దక్షిణ రైల్వే నిర్వహిస్తోంది. అయితే ఈ రైళ్లు తమిళనాడు, ఆంధ్రప్రదేశ్, తెలంగాణ, మహారాష్ట్ర, మధ్యప్రదేశ్, ఉత్తరప్రదేశ్, బీహార్ రాష్ట్రాల గుండా ప్రయాణిస్తాయి.
ముఖ్యంగా తెలుగు రాష్ట్రాల ప్రయాణికులకు ఉపయోగపడేలా ప్రధాన స్టేషన్లలో హాల్టింగ్ సౌకర్యం కల్పించారు. ఆంధ్రప్రదేశ్ పరిధిలోని గూడూరు (15.48/16.50), నెల్లూరు (17.28/17.30), ఒంగోలు (18.58/19.00), విజయవాడ జంక్షన్ (21.15/21.25) స్టేషన్లలో ఈ రైలు ఆగుతుంది.
ఇక తెలంగాణ పరిధిలోని ఖమ్మం (23.38/23.40), వరంగల్ (01.08/01.10), సిర్పూర్ కాగజ్‌నగర్ (03.58/04.00) స్టేషన్లలో స్టాపేజీలు కేటాయించారు. వీటితో పాటు ఈరోడ్, సేలం, కాట్పాడి, పేరంబూర్, బల్లార్షా, నాగ్‌పూర్, ఇటార్సీ, జబల్‌పూర్, పండిట్ దీన్ దయాళ్ ఉపాధ్యాయ జంక్షన్, బక్సర్, పాట్లీపుత్ర మీదుగా ఈ రైలు రాకపోకలు సాగిస్తుంది.
ఈ ప్రత్యేక రైలులో ప్రయాణికుల సౌకర్యార్థం మొత్తం 20 బోగీలను ఏర్పాటు చేశారు. అందులో 18 చైర్ కార్ కోచ్‌లతో పాటు, ఒక సెకండ్ క్లాస్ దివ్యాంగజన్ ఫ్రెండ్లీ కోచ్, ఒక లగేజ్ కమ్ బ్రేక్ వ్యాన్ ఉన్నాయని రైల్వే అధికారులు పేర్కొన్నారు.