యాదగిరిగుట్ట భక్తులకు శుభవార్త - తులాభారం సేవలు పునఃప్రారంభం, ఈ తేదీలో కోటి పుష్పార్చన

యాదగిరిగుట్ట శ్రీ లక్ష్మీనరసింహస్వామి ఆలయంలో నేటి నుంచి తులాభారం, తోమాలసేవలను తిరిగి ప్రారంభిస్తున్నట్లు ఆలయ అధికారులు ప్రకటించారు. భక్తులు తమ కోరికల మేరకు నగదు లేదా వివిధ రకాల సరకులతో తులాభారం తూగి స్వామివారికి మొక్కులు తీర్చుకోవచ్చు.

ప్రముఖ పుణ్యక్షేత్రమైన యాదగిరిగుట్ట శ్రీలక్ష్మీనరసింహస్వామి దేవస్థానంలో భక్తుల కోరిక మేరకు కీలక ఆర్జిత సేవలు మళ్లీ అందుబాటులోకి రానున్నాయి. ఆలయంలో తులాభారం, తోమాలసేవలను గురువారం(నేటి) నుంచి పునఃప్రారంభిస్తున్నట్లు దేవస్థానం కార్యనిర్వహణాధికారి (ఈవో) భవానీశంకర్ వెల్లడించారు. గతంలో ప్రవేశపెట్టి నిలిపివేసిన ఈ సంప్రదాయ సేవలను భక్తుల సౌకర్యార్థం తిరిగి మొదలుపెడుతున్నట్లు ఆయన తెలిపారు.

యాదగిరిగుట్ట ఆలయం

తోమాలసేవ, తులాభారం వివరాలివే….

తోమాలసేవలో పాల్గొనదలచిన భక్తులు రూ. 1,250 చెల్లించి టికెట్ కొనుగోలు చేయాల్సి ఉంటుంది. ఉదయం సహస్రనామార్చన పూర్తయిన వెంటనే టికెట్ పొందిన దంపతులను గర్భాలయంలోకి అనుమతించి తోమాలసేవలో పాల్గొనే అవకాశం కల్పిస్తారు.సేవ అనంతరం స్వామివారి ప్రసాదంగా అభిషేకం లడ్డూతో పాటు ఉత్తరీయాన్ని ఆలయ అధికారులు అందజేస్తారు.

ఇక మొక్కులు తీర్చుకునే భక్తుల కోసం తులాభారం సేవను కూడా అందుబాటులోకి తెచ్చారు. భక్తులు తమ బరువుకు సమానంగా నగదు లేదా వివిధ రకాల సరకులను సమర్పించి తులాభారం మొక్కును చెల్లించుకోవచ్చని ఈవో భవానీశంకర్ వివరించారు.

కార్తీక ఏకాదశి వేళ కోటి పుష్పార్చన :

మరోవైపు…. ఎల్ నినో ప్రభావం నేపథ్యంలో రాష్ట్రం పాడిపంటలతో సుభిక్షంగా ఉండాలని ఆకాంక్షిస్తూ దేవస్థానం ప్రత్యేక వైదిక కార్యక్రమానికి శ్రీకారం చుట్టింది. పవిత్ర కార్తీక మాసంలోని ఏకాదశి పర్వదినాన్ని పురస్కరించుకుని నవంబర్ 20వ తేదీ శుక్రవారం నాడు శ్రీ లక్ష్మీనరసింహస్వామి నామార్చన సహిత 'కోటి పుష్పార్చన' నిర్వహించనున్నారు. శుక్రవారం ఉదయం 7 గంటల నుంచి మధ్యాహ్నం 12 గంటల వరకు అత్యంత వైభవంగా ఈ పూజా క్రతువు కొనసాగుతుంది.

కార్తీక మాస ఉత్సవాల్లో భాగంగా యాదగిరిగుట్ట దేవస్థానం ఆధ్వర్యంలో నవంబర్ 20 నుంచి 22 వరకు మూడు రోజుల పాటు ప్రముఖులతో ఆధ్యాత్మిక, సాంస్కృతిక కార్యక్రమాలను ఏర్పాటు చేశారు.

• నవంబర్ 20 : ప్రముఖ ఆధ్యాత్మిక వేత్త బ్రహ్మశ్రీ మాడుగుల నాగఫణి శర్మ ఆధ్యాత్మిక ప్రవచనం చేస్తారు. అనంతరం తేలు విజయ భక్తి సంగీత కార్యక్రమాన్ని నిర్వహిస్తారు.
• నవంబర్ 21: ప్రముఖ సంగీత దర్శకులు ఆర్.పి. పట్నాయక్ ఆధ్వర్యంలో ప్రత్యేక సంగీత విభావరి ప్రేక్షకులను అలరించనుంది.
• నవంబర్ 22 : పరంపర సంస్థ ఆధ్వర్యంలో అభినేత్రి బృందం సభ్యులు తెలంగాణ దేవాలయాల విశిష్టతను చాటిచెప్పే ఇతివృత్తంతో ప్రత్యేక నృత్య ప్రదర్శన ఇవ్వనున్నారు.