ప్రయాణికులకు అలర్ట్ - ఏపీ మీదుగా బెంగళూరుకు ప్రత్యేక రైళ్లు, హాల్ట్ స్టేషన్ల లిస్ట్ ఇదే

పండుగల వేళ ప్రయాణికుల రద్దీని దృష్టిలో ఉంచుకుని తిన్ సుకియా - బెంగళూరు మధ్య ప్రత్యేక రైళ్లను నడుపుతున్నట్లు రైల్వే శాఖ ప్రకటించింది. తెలుగు రాష్ట్రాల్లోని ప్రధాన స్టేషన్లలో ఈ రైళ్లు ఆగనున్నాయి.

పండుగ సీజన్‌లో ప్రయాణికుల రద్దీని తగ్గించేందుకు భారతీయ రైల్వే కీలక నిర్ణయం తీసుకుంది. అస్సాంలోని న్యూ తిన్‌సుకియా నుంచి బెంగళూరులోని SMVT మధ్య ప్రత్యేక ఎక్స్‌ప్రెస్ రైళ్లను నడపనున్నట్లు ప్రకటించింది. ఇరువైపులా చెరో 6 సర్వీసుల చొప్పున మొత్తం 12 ప్రత్యేక సర్వీసులను అందుబాటులోకి తెచ్చింది.

ఏపీ మీదుగా బెంగళూరుకు ప్రత్యేక రైళ్లు

ఈ ప్రత్యేక రైళ్లు ఆంధ్రప్రదేశ్, తెలంగాణలకు చెందిన వేలాది మంది ప్రయాణికులకు, ముఖ్యంగా బెంగళూరు వైపు వెళ్లే ఉద్యోగులు, విద్యార్థులకు ఎంతో ప్రయోజనకరంగా మారనున్నాయి. ఏపీలోని శ్రీకాకుళం రోడ్, చీపురుపల్లి, విజయనగరం, కొత్తవలస, సింహాచలం నార్త్, దువ్వాడ, రాజమండ్రి, విజయవాడ, ఒంగోలు, నెల్లూరు, గూడూరు వంటి ప్రధాన స్టేషన్లలో ఈ రైలుకు హాల్టింగ్ సౌకర్యం కల్పించారు.

ట్రైన్ టైమింగ్స్…

న్యూ తిన్‌సుకియా - SMVT బెంగళూరు ఎక్స్‌ప్రెస్ స్పెషల్ (ట్రైన్ నంబర్: 05952) : ఈ రైలు న్యూ తిన్‌సుకియాలో గురువారం సాయంత్రం 18:45 గంటలకు బయలుదేరి, నాల్గవ రోజు (ఆదివారం) ఉదయం 09:30 గంటలకు SMVT బెంగళూరు చేరుకుంటుంది.

• సర్వీసు తేదీలు (గురువారాలు): అక్టోబర్ 08, 15, 22, 29 మరియు నవంబర్ 05, 12 తేదీల్లో నడుస్తుంది.

SMVT బెంగళూరు - న్యూ తిన్‌సుకియా ఎక్స్‌ప్రెస్ స్పెషల్ (ట్రైన్ నంబర్: 05951): తిరుగు ప్రయాణంలో ఈ రైలు SMVT బెంగళూరులో సోమవారం అర్ధరాత్రి 00:05 గంటలకు (ఆదివారం దాటాక) బయలుదేరి, మూడవ రోజు (బుధవారం) సాయంత్రం 16:25 గంటలకు న్యూ తిన్‌సుకియా చేరుకుంటుంది.

• సర్వీసు తేదీలు (సోమవారాలు): అక్టోబర్ 12, 19, 26 మరియు నవంబర్ 02, 09, 16 తేదీల్లో ప్రయాణికులకు అందుబాటులో ఉంటుంది.

హాల్టింగ్ స్టేషన్లు…

ఈ రైళ్లు దిబ్రూగఢ్, గౌహతి (రంగియా), న్యూ జల్ పాయి గురి, మాల్దా టౌన్, ఖరగ్‌పూర్, భువనేశ్వర్, పలాస, శ్రీకాకుళం, చీపురుపల్లి, కొత్తవలస, సింహాచలం, దువ్వాడ, రాజమండ్రి, విజయవాడ, ఒంగోలు, నెల్లూరు, గుడూరుతో పాటు పలు స్టేషన్లలో ఆగుతాయి. పండుగల సమయంలో స్వగ్రామాలకు వెళ్లే వారికి…. ఐటీ ఉద్యోగులకు ఈ ప్రత్యేక సర్వీసులు ఎంతగానో ఉపశమనం కలిగిస్తాయని రైల్వే అధికారులు తెలిపారు.