ఇవాళ ఏపీకి తమిళనాడు సీఎం విజయ్ - చంద్రబాబుతో కీలక సమావేశం!

ఇవాళ తమిళనాడు సీఎం విజయ్ అమరావతి రానున్నారు. ఏపీ సీఎం చంద్రబాబు నాయుడుతో సమావేశం కానున్నారు. చెన్నై తాగునీటి అవసరాల కోసం కృష్ణా జలాలను విడుదల చేయాలని కోరనున్నారు.

తమిళనాడు ముఖ్యమంత్రి సి. జోసెఫ్ విజయ్ మంగళవారం ఆంధ్రప్రదేశ్ ముఖ్యమంత్రి నారా చంద్రబాబు నాయుడుతో భేటీ కానున్నారు. చెన్నై నగర తాగునీటి అవసరాలను తీర్చేందుకు కృష్ణా నదీ జలాలను విడుదల చేయాలని కోరనున్నారు. అంతేకాకుండా ఇరు రాష్ట్రాల మధ్య నదీ జలాల నిర్వహణపై ఈ సమావేశంలో సుదీర్ఘంగా చర్చించనున్నారు.

సీఎం విజయ్ టూర్ షెడ్యూల్….

ఏపీ, తమిళనాడు ముఖ్యమంత్రులు (ఫైల్ ఫొటో)

తమిళనాడు సీఎం విజయ్ మంగళవారం(ఇవాళ) మధ్యాహ్నం 3:30 గంటలకు గన్నవరం విమానాశ్రయానికి చేరుకుంటారు. అక్కడ నుంచి నేరుగా వెళ్లి సాయంత్రం 4:15 గంటలకు ఏపీ సీఎం చంద్రబాబు నాయుడుతో అధికారిక చర్చల్లో పాల్గొంటారు. తెలుగు గంగా ప్రాజెక్ట్ కింద చెన్నై నగరానికి రావాల్సిన కృష్ణా నీటిని వేగంగా విడుదల చేయడంపై ఈ భేటీలో ప్రధానంగా చర్చించనున్నారు. దీంతో పాటు తీవ్ర చర్చనీయాంశంగా మారిన గోదావరి - కృష్ణా - కావేరి నదుల అనుసంధానం ప్రాజెక్టుపై కూడా ఇద్దరు ముఖ్యమంత్రులు మాట్లాడతారని సమాచారం.

ఈ పర్యటనలో భాగంగా తమిళనాడు సీఎం విజయ్…. ఏపీ ఉపముఖ్యమంత్రి పవన్ కళ్యాణ్‌తో కూడా సమావేశమయ్యే అవకాశం ఉంది. అనంతరం విజయవాడలో జరుగుతున్న 'విజయవాడ ఉత్సవ్ 2.0' సాంస్కృతిక వేడుకలకు ఆయన హాజరవుతారు. సాయంత్రం ఇంద్రకీలాద్రిపై వేంచేసి ఉన్న శ్రీ దుర్గా మల్లేశ్వర స్వామి (కనకదుర్గ) వారిని దర్శించుకుని ప్రత్యేక పూజలు నిర్వహిస్తారు. పర్యటన ముగించుకుని మంగళవారం రాత్రికే ఆయన తిరిగి చెన్నైకి చేరుకుంటారు.

చెన్నై నగరం ఎదుర్కొంటున్న ప్రస్తుత తాగునీటి ఎద్దడి, పూండితో సహా ప్రధాన జలాశయాల్లో ఉన్న నీటి మట్టాలు, ఈ ఏడాది ఇప్పటివరకు అందిన కృష్ణా నీటి పరిమాణానికి సంబంధించిన పూర్తి వివరాలను, ఆధారాలను సీఎం విజయ్… ఏపీ సీఎం ముందుంచాలని కోరారు. కండలేరు నుంచి వీలైనంత త్వరగా నీటిని విడుదల చేసేలా చంద్రబాబును ఒప్పించాలని సుందర్రాజన్ ఒక ప్రకటనలో పేర్కొన్నారు.