E-Paper
Bimal Oberoi: చాలా ఆడిషన్స్ ఇచ్చాను, గుండు చేయించుకున్నా- రణ్వీర్ హీరోలా కాదు నిర్మాతలా ఉంటాడు: ధురంధర్ 2 నటుడు బిమల్
Bimal Oberoi On Dhurandhar 2 Audition Ranveer Singh: బాక్సాఫీస్ వద్ద రికార్డులు తిరగరాస్తున్న ‘ధురంధర్: ది రివెంజ్’ చిత్రంలో ‘శిరానీ’ పాత్రలో మెప్పించిన బిమల్ ఒబెరాయ్ తనకు ఆ ఛాన్స్ ఎలా వచ్చిందో చెప్పారు. అలాగే, సెట్లో రణ్వీర్ సింగ్ ఎలా మెలిగేవాడు తెలిపారు బిమల్ ఒబెరాయ్.
దర్శకుడు ఆదిత్య ధర్ తెరకెక్కించిన స్పై యాక్షన్ థ్రిల్లర్ ‘ధురంధర్: ది రివెంజ్’ బాక్సాఫీస్ వద్ద కలెక్షన్ల సునామీ సృష్టిస్తోంది. ఈ సినిమాలో ప్రతి పాత్రకు ఒక ప్రత్యేకత ఉంది. ముఖ్యంగా ‘షేర్-ఏ-బలోచ్’ అనే బిరుదును అందించే ‘శిరానీ’ పాత్ర ఇప్పుడు సోషల్ మీడియాలో మీమ్ మెటీరియల్గా మారి బాగా వైరల్ అవుతోంది. ఈ పాత్రలో నటించిన నటుడు, నిర్మాత బిమల్ ఒబెరాయ్ తాజాగా ఒక ఇంటర్వ్యూలో ధురంధర్ 2 సినిమా విశేషాలను, రణ్వీర్ సింగ్తో తన అనుబంధాన్ని పంచుకున్నారు.
ఆడిషన్స్తో మొదలైన ప్రయాణం
ఈ సినిమాలో అవకాశం ఎలా వచ్చిందనే విషయంపై బిమల్ స్పందిస్తూ.. "నేను ఈ ప్రాజెక్టులో చాలా ఆలస్యంగా చేరాను. అప్పటికే సినిమా షూటింగ్ చాలా వరకు పూర్తయింది. శిరానీ పాత్ర కోసం సరైన నటుడి కోసం వెతుకుతున్న సమయంలో నేను ఆడిషన్ ఇచ్చాను" అని చెప్పారు.
"నేను కొన్ని నెలల్లోనే చాలా ఆడిషన్స్ ఇచ్చాను. వాళ్లు మళ్లీ కాల్ చేస్తామని చెప్పెవారు. ఇదంతా బ్యాక్గ్రౌండ్లో జరిగింది. ఆ తర్వాత ఆదిత్య ధర్ నన్ను కలిసి, ఈ పాత్ర కోసం గడ్డం పెంచి, గుండు గీయించుకోవాలని అడిగారు. అది వినగానే నేను వెంటనే ఒప్పుకున్నాను. ఇది చాలా మంచి పాత్ర. చాలా ప్రిపరేషన్ కూడా చేశాం. 2018లో మళ్లీ నటనను ప్రారంభించిన నాకు ఇది ఒక అద్భుతమైన అవకాశం" అని బిమల్ ఒబెరాయ్ తెలిపారు.
రణ్వీర్ సింగ్ ఒక ఆల్ రౌండర్
షూటింగ్ సెట్లో రణ్వీర్ సింగ్ ప్రవర్తనపై బిమల్ ఒబెరాయ్ ప్రశంసల వర్షం కురిపించారు. "రణ్వీర్ ఈ సినిమాను ఓన్ చేసుకున్నారు. సెట్లో ఆయన కేవలం ‘హమ్దా’ అనే నటుడిలా మాత్రమే కాకుండా.. ఒక అసిస్టెంట్ డైరెక్టర్లా, ఒక నిర్మాతలా అన్ని బాధ్యతలు చూసుకునేవారు" అని బిమల్ తెలిపారు.
"నేను షూటింగ్లో లేటుగా చేరినప్పటికీ, నాకు ఎలాంటి ఇబ్బంది కలగకుండా రణ్వీర్ చూసుకున్నారు. మొదటి రోజు ఒక ఎమోషనల్ సీన్ చేసే ముందు నాతో మాట్లాడి, వాతావరణాన్ని చాలా తేలిక పరిచారు. ఆయన నాకంటే వయసులో చిన్నవాడైనా, ఒక సీనియర్ ప్రొఫెషనల్లా వ్యవహరించారు" అని బిమల్ ఒబెరాయ్ పేర్కొన్నారు.
కథలో కీలక మలుపు
కాగా ధురంధర్ మొదటి భాగంలో అక్షయ్ ఖన్నా పాత్రకు ‘షేర్-ఏ-బలోచ్’ బిరుదునిచ్చిన శిరానీ.. రెండో భాగంలో రెహ్మాన్ డెకాయిత్ మరణం తర్వాత ఆ టైటిల్ను రణ్వీర్ పాత్ర అయిన హమ్జా అలీ మజారీకి అందిస్తారు. ఐఎస్ఐ మేజర్ ఇక్బాల్పై హమ్జా తీర్చుకునే ప్రతీకారంలో శిరానీ పాత్ర ఎంతో కీలకంగా మారుతుంది.
రికార్డుల వేటలో 'ధురంధర్ 2'
మొదటి భాగం ‘ధురంధర్’ ప్రపంచవ్యాప్తంగా రూ. 1,300 కోట్లకు పైగా వసూలు చేసి ప్రభంజనం సృష్టించింది. ఇప్పుడు ‘ధురంధర్: ది రివెంజ్’ కూడా అదే బాటలో నడుస్తోంది. ఇప్పటికే ఈ చిత్రం ప్రపంచవ్యాప్తంగా రూ. 1,300 కోట్లకు పైగా గ్రాస్ కలెక్షన్స్ సాధించి మొదటి భాగం రికార్డును అధిగమించింది. భారతీయ సినిమా చరిత్రలో అత్యధిక వసూళ్లు సాధించిన చిత్రాల్లో ఒకటిగా నిలిచేందుకు ధురంధర్ 2 సిద్ధమవుతోంది.
