Secunderabad Station : సికింద్రాబాద్ రైల్వే స్టేషన్ లుక్ మారుతోంది! ప్రయాణికులకు ప్రపంచ స్థాయి సౌకర్యాలు - వేగంగా పనులు

Secunderabad Railway Station Redevelopment : సికింద్రాబాద్ రైల్వే స్టేషన్ పునరాభివృద్ధి పనులు 65 శాతం పూర్తయ్యాయి. రూ. 714.73 కోట్లతో ఎయిర్ కాంకోర్స్, మల్టీ-లెవెల్ పార్కింగ్, మెట్రో స్కైవాక్ వంటి ప్రపంచ స్థాయి వసతులు అందుబాటులోకి వస్తున్నాయి.

Secunderabad Railway Station Redevelopment : హైదరాబాద్‌లోని అత్యంత కీలకమైన, దేశంలోనే అత్యంత రద్దీగా ఉండే రైల్వే స్టేషన్లలో ఒకటైన సికింద్రాబాద్ రైల్వే స్టేషన్ త్వరలోనే సరికొత్త రూపంలో ప్రయాణికులకు దర్శనమివ్వనుంది. ప్రయాణికులకు విమానాశ్రయ స్థాయి సౌకర్యాలను అందించే లక్ష్యంతో చేపట్టిన ప్రపంచ స్థాయి అత్యాధునిక పునరాభివృద్ధి (రిడెవలప్‌మెంట్) పనులు ప్రస్తుతం శరవేగంగా జరుగుతున్నాయి. ఈ బృహత్తర ప్రాజెక్టుకు సంబంధించిన పనులు ఇప్పటికే 65 శాతం పూర్తి కావొచ్చాయి.

శరవేగంగా సికింద్రాబాద్ రైల్వే స్టేషన్ పునరాభివృద్ధి పనులు

ప్రతిరోజూ ఈ స్టేషన్ నుంచి సుమారు 180 రైళ్లు రాకపోకలు సాగిస్తుంటాయి. సగటున 1.5 లక్షల మంది ప్రయాణికులు తమ గమ్యస్థానాలకు చేరుకోవడానికి ఈ స్టేషన్‌పైనే ఆధారపడతారు. పెరిగిన ప్రయాణికుల రద్దీకి అనుగుణంగా, రాబోయే ఐదు దశాబ్దాల అవసరాలను దృష్టిలో ఉంచుకుని ఈ సమగ్ర పునర్నిర్మాణాన్ని ప్లాన్ చేశారు. పనులు శరవేగంగా పూర్తి చేసి…. త్వరలోనే ఈ నూతన టెర్మినల్‌ను ప్రజలకు అందుబాటులోకి తెచ్చేందుకు అధికారులు రాత్రింబవళ్లు శ్రమిస్తున్నారు.

కేంద్ర ప్రభుత్వం ఈ స్టేషన్ ఆధునికీకరణ కోసం రూ. 714.73 కోట్ల బడ్జెట్‌ను కేటాయించింది. పాత కట్టడాల స్థానంలో సుందరమైన, అత్యంత ఆకర్షణీయమైన నూతన స్టేషన్ భవనాలను నిర్మిస్తున్నారు.

ప్రాజెక్ట్ విశేషాలు:

• ప్లాట్‌ఫారమ్‌లన్నింటినీ కవర్ చేస్తూ అత్యాధునిక డిజైన్‌తో కూడిన రూఫ్ టాప్‌ల ఏర్పాటు.
• ప్రయాణికులు ప్రశాంతంగా వేచి ఉండేందుకు వీలుగా విశాలమైన రెండు అంతస్తుల ఎయిర్ కాంకోర్స్ నిర్మాణం.
• స్టేషన్‌కు వచ్చే వాహనాల రద్దీని నివారించేందుకు బహుళ అంతస్తుల పార్కింగ్ సదుపాయం.
• వృద్ధులు, దివ్యాంగులు, చిన్నారుల సౌకర్యార్థం 26 లిఫ్టులు, 32 ఎస్కలేటర్లతో పాటు వేగంగా నడవడానికి ట్రావలేటర్ల ఏర్పాటు.
• సమీపంలోని మెట్రో స్టేషన్‌తో నేరుగా అనుసంధానించేలా ప్రత్యేక స్కైవాక్‌ల నిర్మాణం.
• క్లీన్ ఎనర్జీ కోసం సోలార్ పవర్ ప్లాంట్లు, విద్యుత్ వాహనాల కోసం ఈవీ (EV) ఛార్జింగ్ పాయింట్లు, మురుగునీటి శుద్ధి కేంద్రం (STP).
• ప్రయాణికుల రక్షణ కోసం అత్యాధునిక నిఘా, భద్రతా వ్యవస్థలు.

ఇప్పటికే పూర్తయిన పనులు….

ప్రస్తుతం ఉత్తరం (నార్త్) వైపు మల్టీ-లెవెల్ పార్కింగ్ భవనం, నార్త్ స్టేషన్ ప్రధాన భవనం పనులు జోరుగా సాగుతున్నాయి. ప్లాట్‌ఫారమ్‌ల పైన నిర్మించే భారీ ఎయిర్ కాంకోర్స్ పనులు, హైదరాబాద్ వైపు ఫుట్ ఓవర్ బ్రిడ్జి నిర్మాణం తుది దశకు చేరుకుంటున్నాయి. వీటితో పాటు ట్రావలేటర్లు, నీటి అవసరాల కోసం వాటర్ ట్యాంకులు, మురుగునీటి శుద్ధి కేంద్రం , మెట్రోను నేరుగా కలిపే స్కైవాక్ నిర్మాణ పనులు వేగంగా సాగుతున్నాయి.

ప్రధానమంత్రి నరేంద్ర మోదీ నాయకత్వంలో తెలంగాణలో రైల్వే మౌలిక సదుపాయాలను సమగ్రంగా ఆధునికీకరించేందుకు కేంద్ర ప్రభుత్వం పూర్తిగా కట్టుబడి ఉందని కేంద్ర మంత్రి జి. కిషన్ రెడ్డి ఒక ప్రకటనలో స్పష్టం చేశారు. ఈ మేరకు కొన్ని ఫొటోలను షేర్ చేశారు. ఈ ప్రాజెక్టు పూర్తయితే హైదరాబాద్ నగర మౌలిక వసతుల రంగానికే సికింద్రాబాద్ రైల్వే స్టేషన్ ఒక మకుటాయమానంగా నిలుస్తుందని ఆయన ఆశాభావం వ్యక్తం చేశారు.