E-Paper
Anirudh Kavya Marriage: అనిరుధ్ రవిచందర్, కావ్య మారన్ పెళ్లి- సీఎం రేవంత్ రెడ్డికి ఆహ్వానం- మ్యారేజ్, రిసెప్షన్ వివరాలు!
Anirudh Kavya Marriage Invitation To CM Revanth Reddy: అనిరుధ్ రవిచందర్, ఎస్ఆర్‌హెచ్ సీఈఓ కావ్య మారన్ పెళ్లి వార్తలు మళ్లీ చర్చనీయాంశమయ్యాయి. సన్ గ్రూప్ అధినేత కళానిధి మారన్ దంపతులు హైదరాబాద్‌లో సీఎం రేవంత్ రెడ్డిని కలిసి వీరి వివాహ, రిసెప్షన్‌కు ఆహ్వానించడంతో ఈ జంట పెళ్లి వార్తలకు తెరపడింది.
Prefer HTon Google
Anirudh Ravichander Kavya Maran Marriage Invitation To CM Revanth Reddy: కోలీవుడ్ మ్యూజిక్ సెన్సేషన్ అనిరుధ్ రవిచందర్, సన్‌రైజర్స్ హైదరాబాద్ సీఈఓ కావ్య మారన్‌ల పెళ్లి టాపిక్ గత కొంతకాలంగా ఆసక్తిగా మారుతూ వస్తుంది. తాజాగా మరోసారి వీరి పెళ్లి విషయం ఇంట్రెస్టింగ్‌గా మారింది.
పెళ్లిపై అధికారిక ప్రకటన
దక్షిణాది చిత్ర పరిశ్రమతో పాటు ఐపీఎల్ అభిమానుల్లోనూ ఆసక్తి రేపుతున్న ఈ జంట పెళ్లికి సంబంధించి అధికారిక ప్రకటన దాదాపుగా వచ్చేసినట్లే కనిపిస్తోంది. ఇప్పటివరకు అనిరుధ్, కావ్య మారన్ పెళ్లిపై వచ్చిన ఊహాగానాలకు తెరదించింది తెలంగాణ సీఎంఓ కార్యాలయం.
తెలంగాణ సీఎం రేవంత్ రెడ్డికి అనిరుధ్, కావ్య వెడ్డింగ్ ఇన్విటేషన్ తాజాగా అందింది. సన్ గ్రూప్ అధినేత కళానిధి మారన్ తన సతీమణితో కలసి హైదరాబాద్‌కు విచ్చేసి, తెలంగాణ ముఖ్యమంత్రి అనుముల రేవంత్ రెడ్డికి వివాహ ఆహ్వాన పత్రికను స్వయంగా అందించారు. ఈ విషయాన్ని తెలంగాణ సీఎంఓ ట్వీట్ చేసింది.
సీఎం రేవంత్ రెడ్డికి మారన్ దంపతుల ఆహ్వానం
జూబ్లీహిల్స్‌లోని ముఖ్యమంత్రి నివాసంలో రేవంత్ రెడ్డి, ఆయన సతీమణిని మారన్ దంపతులు శోభాయమానంగా కలిశారు. తమ కుమార్తె కావ్య మారన్, ప్రముఖ సంగీత దర్శకుడు అనిరుధ్ రవిచందర్, కావ్య మారన్ వివాహ రిసెప్షన్‌కు హాజరుకావాలని వారు కోరారు. ఈ వేడుక నవంబర్ 21వ తేదీన చెన్నైలో వైభవంగా జరగనుందని సమాచారం.
డెస్టినేషన్ వెడ్డింగ్ ఎక్కడ? చెన్నైలో గ్రాండ్ రిసెప్షన్!
హైదరాబాద్‌తో సన్‌రైజర్స్ ఫ్రాంచైజీకి ఉన్న అనుబంధం, తెలుగు రాష్ట్రాల్లో కావ్య మారన్‌కు ఉన్న పాపులారిటీ దృష్ట్యా ఈ భేటీకి ప్రాధాన్యం ఏర్పడింది. ఇప్పటివరకు ఇరు కుటుంబాలు అధికారిక ప్రకటన విడుదల చేయనప్పటికీ, పెళ్లి వేడుకకు సంబంధించిన విశేషాలు నెట్టింట హల్‌చల్ చేస్తున్నాయి.
నవంబర్ 11న గ్రీస్‌లోని మనోహరమైన లొకేషన్‌లో అత్యంత సన్నిహితులు, కుటుంబ సభ్యుల మధ్య ఈ డెస్టినేషన్ వెడ్డింగ్ జరగనుందని సమాచారం. ఆ తర్వాత నవంబర్ 14న చెన్నైలో ఓ ప్రత్యేక కార్యక్రమం, నవంబర్ 21న చిత్ర పరిశ్రమ, రాజకీయ రంగానికి చెందిన వీఐపీల కోసం భారీ రిసెప్షన్ ఏర్పాటు చేస్తున్నారని తెలుస్తోంది.
తెలుగు గడ్డపై ఇద్దరికీ అపారమైన అభిమాన గణం
అనిరుధ్ బంధువు, సీనియర్ నటుడు వై.జి. మహేంద్రన్ ఒక ఇంటర్వ్యూలో ఇదివరకు ఇచ్చిన హింట్ కూడా ఈ ప్రచారానికి బలాన్ని ఇచ్చింది. తెలుగు రాష్ట్రాల ప్రజలకు అనిరుధ్, కావ్య మారన్ ఇద్దరూ ఎంతో సుపరిచితులే. 'జర్సీ', 'గ్యాంగ్ లీడర్' నుంచి ఇటీవల వచ్చిన 'ది ప్యారడైజ్' వరకు అనిరుధ్ అందించిన స్వరాలు తెలుగు యువతను ఊపేశాయి.
అటు ఐపీఎల్ మ్యాచ్‌లు జరిగిన ప్రతీసారి ఉప్పల్ స్టేడియం గ్యాలరీలో ఉత్సాహంగా కనిపించే కావ్య మారన్‌ను క్రికెట్ అభిమానులు సొంత ఇంటి అమ్మాయిలా భావిస్తారు. సన్‌రైజర్స్ హైదరాబాద్ పగ్గాలు చేపట్టినప్పటి నుంచి మైదానంలో ఆమె ఇచ్చే ఎక్స్‌ప్రెషన్లు సోషల్ మీడియాలో నిత్యం ట్రెండ్ అవుతూనే ఉంటాయి.
వీఐపీల సందడి.. సినీ రాజకీయ దిగ్గజాల హాజరు
సన్ నెట్‌వర్క్ అధినేత ఇంట్లో జరుగుతున్న శుభకార్యం కావడంతో ఈ వేడుకకు దక్షిణాది రాజకీయ, సినీ ప్రముఖులు పెద్ద సంఖ్యలో హాజరుకానున్నారు. తమిళనాడు ముఖ్యమంత్రి, తమిళగ వెట్రి కళగం అధినేత విజయ్‌లతో పాటు టాలీవుడ్, కోలీవుడ్ స్టార్ హీరోలకు కూడా ఆహ్వానాలు వెళ్తున్నట్లు తెలుస్తోంది. సినీ ఫంక్షన్‌ను తలపించేలా ఈ వివాహ మహోత్సవం దక్షిణాది వ్యాప్తంగా ప్రత్యేక ఆకర్షణగా నిలవనుంది.
