E-Paper
Mahesh Babu Ramayana Review: రామాయణంపై మహేశ్ బాబు రివ్యూ- రణ్‌బీర్, సాయి పల్లవి, యశ్ మ్యాజిక్- మా రాముడి కోసం వెయిటింగ్!
Mahesh Babu Ramayana Movie Review: నితేష్ తివారీ ప్రతిష్టాత్మకంగా తెరకెక్కించిన 'రామాయణం' సినిమాపై సూపర్ స్టార్ మహేశ్ బాబు రివ్యూ ఇస్తూ ప్రశంసల జల్లు కురిపించారు. రణ్‌బీర్ కపూర్, యశ్, సాయి పల్లవిల నటన మ్యాజికల్ అని కొనియాడారు. మహేశ్ బాబు రివ్యూకి నెటిజన్లు పలు విధాలుగా కామెంట్స్ పెడుతున్నారు.
Prefer HTon Google
Mahesh Babu Ramayana Movie Review: భారతీయ ఇతిహాసం రామాయణాన్ని అపూర్వమైన విజువల్ వండర్‌గా వెండితెరపైకి తీసుకొచ్చిన దర్శకుడు నితేష్ తివారీ డ్రీమ్ ప్రాజెక్ట్ 'రామాయణం' థియేటర్లలో సందడి చేస్తోంది. ప్రపంచవ్యాప్తంగా విడుదలైన ఈ సినిమాపై సినీ దిగ్గజాలు స్పందిస్తున్నారు.
రామాయణంపై మహేశ్ బాబు రివ్యూ
తాజాగా టాలీవుడ్ సూపర్ స్టార్ మహేశ్ బాబు రామాయణం చిత్రంపై ప్రశంసలు కురిపిస్తూ రివ్యూ ఇచ్చారు. విజువల్ స్కేల్, నటీనటుల ప్రతిభను ఆకాశానికెత్తుతూ సామాజిక మాధ్యమం 'ఎక్స్' వేదికగా ఒక ప్రత్యేకమైన పోస్ట్ పెట్టారు మహేశ్ బాబు.
రామాయణ కథపై చిన్ననాటి జ్ఞాపకాలు
భారతీయ పాఠకులకు, సగటు సినిమాభిమానికి చిన్నతనం నుంచే రామాయణంతో విడదీయరాని అనుబంధం ఉంటుంది. ఇదే విషయాన్ని మహేశ్ బాబు తన సందేశంలో ప్రస్తావించారు.
చిన్ననాటి నుంచి వింటూ పెరిగిన కథలు
"చిన్ననాటి నుంచి మనం వింటూ పెరిగిన కథలు వెండితెరపై ఇంత అద్భుతంగా జీవం పోసుకోవడం చూస్తుంటే మనసు ఎంతో సంతోషంతో నిండిపోతోంది" అని మహేశ్ బాబు తన ఎమోషన్‌ను పంచుకున్నారు.
రణ్‌బీర్, యశ్, సాయి పల్లవి నటనపై ప్రశంసలు
రామాయణ పార్ట్ 1 సినిమాలో నటించిన ప్రధాన తారాగణంపై మహేశ్ బాబు ప్రత్యేకంగా పొగడ్తలు కురిపించారు. రాముడిగా రణ్‌బీర్ కపూర్, సీతగా సాయి పల్లవి, రావణుడిగా కన్నడ రాకింగ్ స్టార్ యశ్ తమ పాత్రల్లో ఒదిగిపోయిన తీరును అభినందించారు. "రణ్‌బీర్ కపూర్, యశ్, సాయి పల్లవి.. వీళ్ల నటన నిజంగా మ్యాజికల్" అని పేర్కొన్నారు.
నిర్మాత, దర్శకుడిని కొనియాడిన మహేశ్
భారీ బడ్జెట్‌తో రామాయణం చిత్రాన్ని తెరకెక్కించిన నిర్మాత నమిత్ మల్హోత్రా, దర్శకుడు నితేష్ తివారీ శ్రమను మహేశ్ కొనియాడారు. "ఇంత భారీ ఎత్తున సినిమాను రూపొందించేందుకు మీరు పడిన శ్రమకు హాట్సాఫ్. ఈ ప్రాజెక్ట్ సాధించిన విజయానికి 'రామాయణ్' చిత్రబృందం మొత్తానికి నా అభినందనలు" అని మహేశ్ బాబు రాసుకొచ్చారు.
మా రాముడు కోసం వెయిటింగ్
అయితే, మహేశ్ బాబు ట్వీట్ వైరల్ కావడంతో నెటిజన్స్ పలు విధాలుగా స్పందిస్తున్నారు. "వారణాసిలో రాముడిగా చేస్తున్న మహేశ్ బాబు తన పాత్రపైనే ప్రశంసలు కురిపించారు", "తన పాత్ర చేసిన రణ్‌బీర్ కపూర్‌ను పొగడటం భలే ఉంది", "మేము మా రాముడి కోసం ఎదురుచూస్తున్నాం" అంటూ కామెంట్స్ వస్తున్నాయి.
రెండు భాగాలుగా పౌరాణిక దృశ్యకావ్యం
కాగా, రామాయణ సినిమాలో లక్ష్మణుడిగా రవి దూబే, హనుమంతుడిగా సన్నీ డియోల్, సూర్పణఖగా రకుల్ ప్రీత్ సింగ్ కీలక పాత్రల్లో అలరించారు. భారతీయుల సాంస్కృతిక ముద్రగా నిలిచిన రామాయణాన్ని ఆధునిక సాంకేతిక పరిజ్ఞానంతో దృశ్యకావ్యంగా మలిచిన తీరు విమర్శకుల ప్రశంసలు అందుకుంటోంది.
రెండు భాగాలుగా రామాయణం
దర్శకుడు నితేష్ తివారీ ఈ కథను రెండు భాగాలుగా తెరకెక్కిస్తున్న విషయం తెలిసిందే. మొదటి భాగం ఇప్పుడు థియేటర్లలో సందడి చేస్తుండగా, రెండవ భాగాన్ని 2028లో విడుదల చేయడానికి చిత్రబృందం ప్రణాళికలు సిద్ధం చేసింది.
'వారాణాసి' రేంజ్‌లో మహేశ్ బాబు నెక్ట్స్ ప్రాజెక్ట్
మరోవైపు సూపర్ స్టార్ మహేశ్ బాబు కూడా భారతీయ పౌరాణిక, అడ్వెంచర్ ఇతివృత్తంతో రూపుదిద్దుకుంటున్న అత్యంత భారీ ప్రాజెక్ట్‌కు సన్నాహాలు చేస్తున్నారు. దర్శకధీరుడు ఎస్.ఎస్. రాజమౌళి దర్శకత్వంలో రూపుదిద్దుకోనున్న 'వారణాసి' చిత్రంలో మహేశ్ బాబు నటిస్తున్న విషయం తెలిసిందే.
వారణాసిలో ప్రియాంక, పృథ్వీరాజ్
వారణాసి చిత్రంలో మహేశ్ బాబుతోపాటు ప్రియాంక చోప్రా జోనాస్, పృథ్వీరాజ్ సుకుమారన్ మరో ప్రధాన పాత్రలు పోషిస్తున్నారు. పాన్-వరల్డ్ స్థాయిలో తెరకెక్కుతున్న వారణాసి సినిమా కోసం ప్రపంచవ్యాప్తంగా సినీ అభిమానులు ఆసక్తిగా ఎదురుచూస్తున్నారు.
