E-Paper
ఒంటరిగా ఈ 4 పనులు అస్సలు చేయకండి.. విదుర నీతి ఏం చెబుతోందంటే!
మహాభారత కాలంలో మహాత్మా విదురుడు ధృతరాష్ట్రుడికి చెప్పిన నీతులు నేటికీ ఆదర్శనీయం. మనిషి ఒంటరిగా చేయకూడని 4 ముఖ్యమైన పనుల గురించి విదుర నీతి ఏం చెబుతుందో ఈ కథనంలో తెలుసుకోండి.
కొంతమంది ఒంటరిగా ఉండటమే సురక్షితం అని భావిస్తుంటారు. కానీ నిజానికి జీవిత ప్రయాణాన్ని ఒంటరిగా సాగించడం అంత సులువు కాదు. కొన్ని పనులను ఒంటరిగా చేయడానికి ప్రయత్నిస్తే మనకు మనమే నష్టం చేసుకునే ప్రమాదం ఉంది. జీవితంలో నిజమైన బలం ఒంటరితనంలో లేదు, మంచి వ్యక్తుల తోడులో, సరైన అవగాహనలో దాగి ఉందని పెద్దలు చెబుతుంటారు. అందుకే మనకు అండగా ఉండే మన కుటుంబం, స్నేహితులతో కలిసి కొన్ని పనులు చేయడం ఎంతో అవసరం. నిజమైన తోడే మనకు కొండంత బలం.
మహాభారత కాలంలో గొప్ప నీతిశాస్త్ర కోవిదుడిగా పేరుగాంచిన మహాత్మా విదురుడు.. ధృతరాష్ట్రుడికి అనేక హితబోధలు చేశారు. ఆయన చెప్పిన విషయాలు నేటి ఆధునిక కాలంలో కూడా మనిషి జీవితాన్ని ప్రశాంతంగా, సుఖంగా మార్చడానికి ఎంతగానో ఉపయోగపడతాయి. విదుర నీతి ప్రకారం కొన్ని పనులను మనిషి ఒంటరిగా చేయడం వల్ల మానసికంగా, శారీరకంగా బలహీనపడతాడు. ఆచార్య విదురుడు తన నీతి శాస్త్రంలో ఒక అద్భుతమైన శ్లోకాన్ని ప్రస్తావించారు.
ఏకః స్వాదు న భుంజీత నైకః సుప్తేషు జాగృయాత్
ఏకో న గచ్చేదధ్వానం నైకశ్చార్థాన్ప్రచింతయేత్
ఈ శ్లోకం అంతరార్థం ఏంటంటే.. రుచికరమైన ఆహారాన్ని ఒంటరిగా తినకూడదు, అందరూ నిద్రిస్తున్నప్పుడు ఒంటరిగా మేల్కొని ఉండకూడదు, సుదీర్ఘ ప్రయాణాన్ని ఒంటరిగా చేయకూడదు, అలాగే అత్యంత కీలకమైన విషయాలపై ఒంటరిగా ఆలోచించి నిర్ణయాలు తీసుకోకూడదు. ఈ నాలుగు పనులను ఒంటరిగా చేయడం వల్ల ఎలాంటి నష్టాలు వస్తాయో ఇప్పుడు వివరంగా తెలుసుకుందాం.
1.రుచికరమైన భోజనం ఒంటరిగా తినొద్దు
విదుర నీతి ప్రకారం, మంచి వంటకాలను ఎప్పుడూ ఒంటరిగా కూర్చుని తినకూడదు. ఒంటరిగా తినడం వల్ల ఆ భోజనం ఇచ్చే తృప్తి తగ్గిపోవడమే కాకుండా, మనసులో ఏదో తెలియని వెలితి ఉంటుంది. అందరితో కలిసి కూర్చుని తినడం వల్ల బంధాలు బలపడతాయి, మాటలు కలిసి ఆనందం రెట్టింపవుతుంది. ఒంటరిగా తినే అలవాటు మనిషిలో స్వార్థాన్ని పెంచుతుంది, అది వారిని లోలోపల కుంగిపోయేలా చేస్తుంది అని ఆచార్య విదురుడు వివరించారు.
2.అందరూ పడుకున్నప్పుడు ఒంటరిగా మేల్కొనవద్దు
ఇంట్లో మిగిలిన కుటుంబ సభ్యులందరూ నిద్రిస్తున్న సమయంలో ఒంటరిగా మేల్కొని ఉండటం అంత మంచిది కాదని విదుర నీతి స్పష్టం చేస్తోంది. రాత్రి సమయం అనేది శరీరానికి, మనసుకు విశ్రాంతిని ఇచ్చేందుకు ఉద్దేశించింది. అందరూ పడుకున్నాక ఒంటరిగా మేల్కొని ఉండటం వల్ల మనసులో రకరకాల ఆందోళనలు, లేనిపోని ఆలోచనలు మొదలవుతాయి. ఇది మానసిక ఒత్తిడికి దారితీస్తుంది. అందుకే రాత్రి వేళల్లో కుటుంబంతో పాటు సమయాన్ని సర్దుబాటు చేసుకుని నిద్రపోవాలి.
3.సుదీర్ఘ ప్రయాణాలు ఒంటరిగా వద్దు
సుదూర ప్రాంతాలకు ఒంటరిగా ప్రయాణం చేయడం సరైన పద్ధతి కాదని విదురుడు సూచించారు. ఒంటరి ప్రయాణాల్లో ప్రమాదాలు లేదా ఆకస్మిక సమస్యలు ఎదురైనప్పుడు ఆదుకునేందుకు ఎవరూ ఉండరు. అదే తోడుగా ఎవరైనా ఉంటే, ప్రయాణం సజావుగా సాగడమే కాకుండా అవసరమైనప్పుడు సహాయం అందుతుంది. నేటి ఆధునిక కాలంలో కూడా సుదీర్ఘ ప్రయాణాలకు వెళ్లేటప్పుడు ఒక నమ్మకమైన వ్యక్తిని తోడుగా తీసుకెళ్లడం ఎంతో ఉత్తమం.
4.కీలక నిర్ణయాలు ఒంటరిగా తీసుకోవద్దు
విదుర నీతిలో చెప్పిన అన్నిటికంటే ముఖ్యమైన విషయం ఏంటంటే.. తీవ్రమైన, జఠిలమైన సమస్యలపై ఒంటరిగా నిర్ణయాలు తీసుకోకూడదు. ఒంటరిగా ఆలోచించడం వల్ల మన ఆలోచనా పరిధి పరిమితంగా ఉంటుంది, దీనివల్ల తప్పుడు నిర్ణయాలు తీసుకునే అవకాశం పెరుగుతుంది. "సమస్య ఎంత పెద్దదైనా నమ్మకమైన వారితో చర్చించి నిర్ణయం తీసుకుంటే పొరపాట్లు జరిగే అవకాశం ఉండదు," అని జ్యోతిష్య శాస్త్ర పండితులు పేర్కొన్నారు. నమ్మకమైన ఇద్దరు ముగ్గురు వ్యక్తులతో లేదా పెద్దలతో చర్చించి నిర్ణయం తీసుకుంటే పొరపాట్లు జరిగే అవకాశం చాలా వరకు తగ్గుతుంది. ఆ నిర్ణయం వల్ల మంచి ఫలితాలు వస్తాయి.
విదుర నీతి ఇచ్చే సందేశం
మనిషి ఒక సామాజిక జీవి అని విదుర నీతి మనకు పదే పదే గుర్తుచేస్తోంది. ఒంటరితనం అనేది కొన్నిసార్లు ఆకర్షణీయంగా అనిపించినప్పటికీ, అది మనిషిని బలహీనుడిని చేస్తుంది. మంచి స్నేహం, పెద్దల సలహాలు, ఆనందాన్ని పంచుకోవడం వల్లనే జీవితం సుఖమయంగా మారుతుంది. ఈ నాలుగు సూత్రాలను పాటించడం వల్ల బంధాలు దృఢంగా ఉంటాయి, తప్పుడు నిర్ణయాల నుంచి రక్షణ లభిస్తుంది, మానసిక ప్రశాంతత చేకూరుతుంది. శతాబ్దాల క్రితం చెప్పిన విదుర నీతి వాక్యాలు నేటి కాలానికి కూడా వంద శాతం సరిపోతాయి.
