Rohit Sharma TV Show: టీవీ షోతో రోహిత్ శర్మ ఎంట్రీ- సోనీ లివ్ ఓటీటీ భారీ లైనప్- సమంత వంటల పోగ్రామ్, అజయ్ క్రైమ్ సిరీస్!

Rohit Sharma Debut With TV Show: భారత క్రికెట్ దిగ్గజం రోహిత్ శర్మ టీవీ ప్రపంచంలోకి అడుగుపెడుతున్నారు. సోనీ పిక్చర్స్ నెట్‌వర్క్ దసరా, దివాళి పండగ సీజన్ కోసం రోహిత్ శర్మ టాక్ షోతోపాటు సమంత వంటల పోగ్రామ్, అజేయ్ దేవ్‌గన్ క్రైమ్ పెట్రోల్ సిరీస్ సహా పలు భారీ ప్రాజెక్టులను ప్రకటించింది.

Rohit Sharma Debut With TV Show On Sony Liv OTT: క్రికెట్ మైదానంలో తన అద్భుతమైన సిక్సర్లు, కెప్టెన్సీతో కోట్లాది మంది అభిమానుల హృదయాలను గెలుచుకున్న హిట్ మ్యాన్ రోహిత్ శర్మ ఇప్పుడు బుల్లితెరపై సందడి చేయడానికి సిద్ధమయ్యారు. పొట్టి ఫార్మాట్ టీ20లు, సుదీర్ఘ టెస్టు క్రికెట్‌కు గుడ్ బై చెప్పిన అనంతరం ఆయన సరికొత్త ఇన్నింగ్స్‌కు శ్రీకారం చుడుతున్నారు.

టీవీ షోతో రోహిత్ శర్మ ఎంట్రీ- సోనీ లివ్ ఓటీటీ భారీ లైనప్- సమంత వంటల పోగ్రామ్, అజయ్ క్రైమ్ సిరీస్!

రోహిత్ శర్మ టీవీ షో టీజర్

సోనీ పిక్చర్స్ నెట్‌వర్క్స్ ఇండియా (SPNI) త్వరలో తీసుకురానున్న ఓ ప్రత్యేక వినోదాత్మక టీవీ షో ద్వారా రోహిత్ శర్మ బుల్లితెరపైకి అడుగుపెడుతున్నట్లు అధికారికంగా ప్రకటించింది. రోహిత్ శర్మ టీవీ షోకి సంబంధించి ఇప్పటికే విడుదలైన టీజర్ సోషల్ మీడియాను ఊపేస్తోంది.

"గార్డెన్‌లో తిరగొద్దు".. నవ్వులు పూయిస్తున్న ప్రోమో!

నిమిషానికి పైగా ఉన్న ఈ వీడియోలో అభిమానులు రోహిత్‌ను చుట్టుముట్టి, మైదానంలో ఆయన వైరల్ చేసిన ఐకానిక్ డైలాగ్ "కోయీ భీ గార్డెన్ మే నహీ ఘూమేగా" (ఎవరూ గార్డెన్‌లో తిరగకూడదు) అని మళ్లీ చెప్పాలని కోరుతారు. ప్రతీ అభిమాని అదే మాట అడుగుతుండటంతో విసుగు చెందిన హిట్ మ్యాన్ అక్కడి నుంచి కోపంగా వెళ్లిపోతున్నట్లు సరదాగా చిత్రీకరించారు.

సోనీ నెట్‌వర్క్ భారీ లైనప్

ఈ టాక్ షో ఎలా ఉండబోతోందో త్వరలోనే పూర్తి వివరాలు వెల్లడించనున్నారు. ఇదిలా ఉంటే, పండగ సీజన్‌ను పురస్కరించుకుని సోనీ నెట్‌వర్క్ హిందీతో పాటు ప్రాంతీయ భాషల్లోనూ భారీ ఎంటర్‌టైన్‌మెంట్ లైనప్‌ను సిద్ధం చేసింది.

అజయ్ దేవ్‌గన్ క్రైమ్ పెట్రోల్ 2026..

బాలీవుడ్ స్టార్ హీరో అజయ్ దేవగన్ హోస్ట్‌గా 'క్రైమ్ పెట్రోల్ 2026' సరికొత్త రీతిలో ముందుకు రానుంది. నిజ జీవితంలో జరిగిన సంచలనాత్మక నేరాల నేపథ్యంతో ఈ సిరీస్ రూపుదిద్దుకుంది. మరోవైపు బిగ్ బి అమితాబ్ బచ్చన్ వ్యాఖ్యాతగా 'కౌన్ బనేగా కరోడ్‌పతి' సీజన్ 18 ఓటీటీ, టీవీ వేదికగా ప్రారంభమైంది.

స్కామ్ 2010 ఓటీటీ రిలీజ్

హన్సల్ మెహతా దర్శకత్వంలో భారీ ఆర్థిక కుంభకోణం ఆధారంగా వస్తున్న 'స్కామ్ 2010' వెబ్ సిరీస్ కూడా సోనీ లివ్‌లో ఓటీటీ రిలీజ్ కానుంది. "భారతీయ ప్రేక్షకులు భాషలతో సంబంధం లేకుండా వైవిధ్యమైన వినోదాన్ని కోరుకుంటున్నారు. అందుకే అన్ని ప్రాంతాల ప్రేక్షకులను ఆకట్టుకునేలా బుల్లితెర, ఓటీటీ స్ట్రీమింగ్ ప్లాట్‌ఫామ్స్ కోసం భారీ షోలను అందిస్తున్నాం" అని సోనీ పిక్చర్స్ నెట్‌వర్క్స్ ఇండియా ఎండీ, సీఈఓ గౌరవ్ బెనర్జీ తెలిపారు.

సమంత మాస్టర్ చెఫ్!

తెలుగు, తమిళ ప్రేక్షకులకు సైతం సోనీ లివ్ అదిరిపోయే కంటెంట్ అందుబాటులోకి తెస్తోంది. సౌత్ స్టార్ హీరోయిన్ సమంత రూత్ ప్రభు వ్యాఖ్యాతగా 'మాస్టర్ చెఫ్ తమిళ' రాబోతుండగా, సంగీత మాంత్రికుడు ఏఆర్ రెహమాన్ నేతృత్వంలో 'తమిళ ఐడల్' సింగింగ్ షో ప్రారంభం కానుంది.

సీనియర్ హీరోయిన్ మాధురీ దీక్షిత్ హోస్ట్‌గా

మరాఠీ కేబీసీ 'కోన్ హోనార్ కరోడ్‌పతి'కి సీనియర్ హీరోయిన్ మాధురీ దీక్షిత్ హోస్ట్‌గా వ్యవహరిస్తున్నారు.

బుల్లితెరపై ఏ స్థాయిలో ఆకట్టుకుంటారో?

మైదానంలో సిక్సర్లతో విరుచుకుపడే రోహిత్ శర్మ, బుల్లితెరపై ఏ స్థాయిలో ఆకట్టుకుంటారో చూడాలని అభిమానులు ఆసక్తిగా ఎదురుచూస్తున్నారు.