E-Paper
Leader Review: లీడర్ రివ్యూ- లెజెండ్ శరవణన్ స్పై యాక్షన్ థ్రిల్లర్- పాయల్ రాజ్పుత్, ఆండ్రియా, అమృత సినిమా ఎలా ఉందంటే?
Leader Movie 2026 Review In Telugu And Rating: ది లెజెండ్ తర్వాత హీరో శరవణన్ నటించిన తాజా చిత్రం లీడర్. ఏప్రిల్ 3న థియేటర్లలో విడుదలైన ఈ సినిమాలో పాయల్ రాజ్పుత్ హీరోయిన్గా నటించింది. భారీ హంగులు, యాక్షన్ ఎపిసోడ్లతో రూపొందిన ఈ సినిమా ప్రేక్షకులను ఏ మేరకు అలరించిందో నేటి లీడర్ రివ్యూలో తెలుసుకుందాం.
టైటిల్: లీడర్
నటీనటులు: శరవణన్, పాయల్ రాజ్పుత్, ఆండ్రియా, అమృత అయ్యర్, శ్యామ్, సంతోష్ ప్రతాప్, వీటీవీ గణేష్, లాల్, బాహుబలి ప్రభాకర్, ఐశ్వర్య తదితరులు
కథ, దర్శకత్వం: ఆర్ఎస్ దొరై సెంథిల్ కుమార్
సంగీతం: జిబ్రాన్
సినిమాటోగ్రఫీ: ఎస్ వెంకటేష్
ఎడిటింగ్: ప్రదీప్ ఈ రాఘవ్
నిర్మాణ సంస్థ: లెజెండ్ శరవణ స్టోర్స్ ప్రొడక్షన్స్
నిర్మాత: లెజెండ్ శరవణన్
విడుదల తేది: 3 ఏప్రిల్ 2026
తొలి సినిమా 'ది లెజెండ్'తో ఒక్కసారిగా అందరి దృష్టిని ఆకర్షించిన హీరో శరవణన్. తనదైన స్టైల్, భారీ బడ్జెట్ సినిమాలతో వెండితెరపై సత్తా చాటాలని ఆరాటపడే లెజెండ్ శరవణన్ తాజాగా నటించిన సినిమా లీడర్. ఈ సినిమాలో టాలీవుడ్ హాట్ బ్యూటీ పాయల్ రాజ్పుత్తోపాటు ఆండ్రియా, అమృత అయ్యర్ హీరోయిన్స్గా చేశారు.
ఆర్ఎస్ దొరై సెంథిల్ కుమార్ లీడర్ సినిమాకు దర్శకత్వం వహించారు. టాలీవుడ్ సినిమాలతోపాటు లీడర్ 2026 మూవీ కూడా ఏప్రిల్ 3న థియేటర్లలో విడుదల అయింది. సామాజిక అంశాలకు కమర్షియల్ హంగులు అద్ది తెరకెక్కించిన ఈ సినిమా ఎలా ఉందో నేటి లీడర్ రివ్యూలో చూద్దాం.
కథ:
శక్తివేల్ (శరవణన్) ఒక కారు మెకానిక్. వినికిడి లోపం ఉన్న కూతురు అయిరేని (ఇయల్)ని శక్తివేల్ ఎంతో ప్రాణంగా చూసుకుంటాడు. ఈ క్రమంలో పోలీస్ ఆఫీసర్ ఇంద్రా సత్యమూర్తి (ఆండ్రియా) పోర్టులో అక్రమాలు చేసే సాల్ట్ (బాహుబలి ప్రభాకర్)ను పట్టుకునేందుకు శక్తివేల్ సహాయం కోరుతుంది. కానీ, దానికి శక్తివేల్ నిరాకరిస్తాడు. దాంతో కూతురి కిడ్నాప్ డ్రామా ఆడి సాల్ట్పై శక్తివేల్ తిరగబడేలా చేస్తుంది.
ఆ తర్వాత ఏం జరిగింది? శక్తివేల్ను ఇంద్రా సత్యమూర్తి ఎలాంటి సహాయం కోరింది? తనపై ఎదురుతిరిగిన సాల్ట్ దగ్గర ఉన్న కూతురును శక్తివేల్ ఎలా కాపాడుకున్నాడు? అసలు శక్తివేల్ గతం ఏంటీ? అతనికి మోస్ట్ వాంటెడ్ టెర్రరిస్ట్ డెవిల్ (సంతోష్ ప్రతాప్)కు ఉన్న విరోధం ఏంటీ? ప్రేమించి పెళ్లి చేసుకున్న భార్య మీరా (పాయల్ రాజ్పుత్)ను శక్తివేల్ ఎందుకు చంపాడు? తెలియాలంటే ఈ లీడర్ చూడాల్సిందే.
విశ్లేషణ:
2026లో వచ్చిన ఈ లీడర్ మూవీ ఒక స్పై యాక్షన్ థ్రిల్లర్. దీనికి తండ్రీ-కూతురు బంధాన్ని జోడించి ఎమోషనల్ స్పై యాక్షన్ థ్రిల్లర్గా మలిచారు డైరెక్టర్. తూత్తుకుడి పోర్టు నేపథ్యంలో సాగే కథ ఇది. ఒక మాజీ రా ఏజెంట్ అనుకోని సంఘటనల వల్ల రహస్యంగా బతకాల్సి వస్తుంది. ఈ క్రమంలో పోలీస్ కారణంగా కూతురు ప్రాణాలు ప్రమాదంలో పడటం, దాంతో అజ్ఞాతవాసాన్ని వీడి పోరాడటం వంటి అంశాలతో సాగుతుంది.
శక్తివేల్ గతం, టెర్రరిస్ట్తో ఉన్న విరోధం వంటి అంశాలు అన్ని రెగ్యులర్ స్టోరీ టెంప్లేట్లోనే ఉంటాయి. అయితే, కొన్నిచోట్ల ఆకట్టుకునే యాక్షన్ సీన్స్, తండ్రి కూతుళ్ల బంధానికి సంబంధించి వచ్చే సీన్స్ ఎమోషనల్గా ఆకట్టుకుంటాయి. స్టోరీ రొటీన్గా ఉండటంతో కొత్తదనం కనిపించనట్లు అనిపిస్తుంది. కానీ, టేకింగ్లో దర్శకుడు జాగ్రత్తలు తీసుకున్నారు.
ఊహించే క్లైమాక్స్
ఇక ఇంటర్వెల్లో శక్తివేల్కు సంబంధించి వచ్చే ట్విస్ట్ బాగానే ఉంటుంది. రా ఏజెంట్, తన టీమ్తో చేసే సాహసాలు, హీరోయిన్తో ప్రేమ, పెళ్లి, విలన్తో శత్రుత్వం వంటివి సెకండాఫ్లో అలరిస్తాయి. హీరోయిన్ను హీరో చంపే సీన్ నాటకీయంగా పర్వాలేదనిపిస్తుంది. క్లైమాక్స్ అంతా ఊహించేలా ఉన్న బాగుంటుంది.
ఇక టెక్నికల్ విషయానికొస్తే విజువల్స్ చాలా రిచ్గా గ్రాండ్గా ఉన్నాయి. సినిమాటోగ్రఫీ, ఎడిటింగ్ వర్క్స్ బాగున్నాయి. జిబ్రాన్ సంగీతం పర్వాలేదు. బీజీఎమ్ మూడ్కు తగినట్లుగా వస్తుంది. ఇక డైరెక్టర్ టేకింగ్ ఓకే అని చెప్పుకోవచ్చు. నటుడిగా శరవణన్ ఆకట్టుకున్నారు. రా ఏజెంట్ పాత్రలో సీరియస్ లుక్తో మెప్పించారు. వాకింగ్ స్టైల్, డైలాగ్ డెలివరీ బాగున్నాయి.
తండ్రీ కూతుళ్ల ఎమోషన్స్తో మెప్పించే!
పాయల్ రాజ్పుత్ పాత్ర చాలా తక్కువ నిడివి ఉంటుంది. ఉన్నంతలో అట్రాక్ట్ చేస్తుంది పాయల్. ఆండ్రియా, అమృత అయ్యర్ మిగతా పాత్రలన్ని పరిధి మేర ఆకట్టుకుంటాయి. ఫైనల్గా చెప్పాలంటే రొటీన్ ఫార్ములాతో వచ్చిన తండ్రీ కూతుళ్ల ఎమోషన్స్తో మెప్పించే లీడర్.
