మరో 6 నెలలు కాల్పుల విరమణ.. కేంద్రంపై పోరాటానికి మావోయిస్టు పార్టీ పిలుపు!

తెలంగాణలో కాల్పుల విరమణను మరో ఆరు నెలలు పొడిగిస్తున్నట్లు మావోయిస్ట్ పార్టీ ప్రకటించింది. అయితే రాష్ట్రంలో నెలకొన్న శాంతిని దెబ్బతీసేందుకు కేంద్రం ప్రయత్నిస్తుందన్నారు.

కాల్పుల విరమణపై మావోయిస్టు పార్టీ లేఖ విడుదల చేసింది. ఇందులో భాగంగా కీలక నిర్ణయం తీసుకుంది. మరో ఆరు నెలలు కాల్పుల విరమణ పొడిగించనున్నట్టుగా ప్రకటించింది. తెలంగాణలోని అన్ని పార్టీలు, ప్రజా సంస్థలు, సామాజిక ఉద్యమాలు శాంతియుత వాతావరణం కొనసాగింపు కోసం పెద్ద ఎత్తున ఉద్యమాలను ప్రారంభించాయని పార్టీ అధికారిక ప్రతినిధి జగన్ ఒక ప్రకటనలో తెలిపారు. ప్రజల ఆకాంక్షలకు అనుగుణంగా తెలంగాణ ప్రభుత్వం కూడా చర్యలు చేపట్టిందన్నారు.

ప్రతీకాత్మక చిత్రం

గత మే నెలలో 6 నెలల పాటు కాల్పుల విరమణ ప్రకటించామని, అదే విధంగా ప్రజల ఆకాంక్షలకు అనుగుణంగా మరో 6 నెలలు కాల్పుల విరమణ పొడిగిస్తున్నట్టుగా తెలంగాణ రాష్ట్ర కమిటీ పేరుతో లేఖ విడుదల చేశారు. 'మే నెలలో ఆరు నెలల పాటు కాల్పుల విరమణ ప్రకటించాం. ఈ ఆరు నెలలు కూడా మా వైపు నుండి అదే వ్యూహాన్ని అమలు చేస్తాం. శాంతియుత వాతావరణం కొనసాగేలా చర్యలు కూడా తీసుకున్నాం.' అని లేఖలో జగన్ అన్నారు.

ప్రభుత్వం ఇలాగే కొనసాగాలని తాము కోరుకుంటున్నామని లేఖలో పేర్కొన్నారు. తెలంగాణలో నెలకొన్న ప్రశాంత వాతావరణాన్ని కేంద్రం చెడగొట్టడానికి ప్రయత్నిస్తోందని జగన్ అన్నారు. కేంద్ర ప్రభుత్వ ప్రయత్నాలకు వ్యతిరేకంగా పోరాడటానికి అన్ని పార్టీలు, అన్ని సామాజిక సమూహాలు, సంఘాలు, విద్యార్థులు, మేధావులు, సామాజిక కార్యకర్తలు చేతులు కలపాలని పిలుపునిచ్చారు.

ప్రజల ఆకాంక్షలకు అనుగుణంగా తెలంగాణ రాష్ట్ర ప్రభుత్వం కూడా స్పందించిందని లేఖలో చెప్పారు. ఈ 6 నెలల కాలంలో అనుకున్న పద్ధతులను తమ వైపు నుంచి అమలు చేసి శాంతియుత వాతావరణం ఉండేలా వ్యవహరించామన్నారు. ఇదే శాంతియుత వాతావరణ కొనసాగాలని తెలంగాణ సమాజం కోరుకుంటోందన్నారు. గతంలో కొనసాగిన విధంగానే తమ వైపు నుంచి శాంతియుత వాతావరణాన్ని కొసాగించేందుకు కృషి చేస్తామన్నారు. ప్రభుత్వం వైపు నుంచి కూడా గతంలో వ్యవహరించిన విధంగానే ఉండాలని కోరుకుంటున్నామన్నారు.